Madaxweynaha Soomaaliya ayaa si qoto dheer ugu muujiyey Amiirka Qatar xanuunka iyo murugada shacabka iyo dowladda Soomaaliyeed ee ku aaddan weerarka, isagoo caddeeyey in Soomaaliya si buuxda ula garab taagan tahay Qatar difaaca madax-bannaanideeda iyo amnigeeda qaranka.
Madaxweyne Xasan Sheekh ayaa carabka ku adkeeyey in xadgudubyada noocan oo kale ah ay si toos ah uga hor imaanayaan mabaa’diida Axdiga Qaramada Midoobay, ay khatar ku yihiin xasilloonida gobolka, isla markaana ay wiiqayaan dadaallada nabadeed ee ka socda Bariga Dhexe.
Ugu dambeyntii, Soomaaliya waxay ku biirtay beesha caalamka oo ku baaqaysa in la muujiyo is-xakameyn, la ilaaliyo sharciga caalamiga ah, lana gaaro xabbad-joojin waarta oo xaqiijisa caddaalad, nabad iyo xasillooni waarta oo ka hana-qaadda Bariga Dhexe.
Israa’iil ayaa galinkii dambe ee shalay weerartay dhismo kuyaala magaalada Doxa oo ay ku shirsanaayeen madax sare oo ka tirsan Kooxda Xamaas.
