Dowladda Soomaaliya ayaa ku tilmaantay falkaasi mid gardarro ah oo si toos ah uga hor imaanaya shuruucda caalamiga ah iyo xeerarka xuquuqda aadanaha.
Qoraal rasmi ah oo kasoo baxay Wasaaradda Arrimaha Dibadda iyo Iskaashiga Caalamiga ah ayaa lagu muujiyay walaac xooggan oo ku aaddan saameynta weerarradan ay ku yeelan karaan nabadgelyada iyo xasilloonida gobolka Khaliijka, iyadoo la sheegay in ficilkan uu yahay ku xadgudub baal marsan dhammaan heshiisyada iyo mabaadi’da caalamiga ah ee ilaalinta rayidka.
Wasaaraddu waxay ugu baaqday Golaha Ammaanka ee Qaramada Midoobay inuu si degdeg ah u farageliyo oo uu qaado tallaabooyin wax ku ool ah si loo joojiyo “falalka gardarrada ah”, loogana hortago in shacabka aan waxba galabsan ay noqdaan bartilmaameed colaadeed.
Dowladda Soomaaliya waxay sidoo kale markale caddeysay mowqifkeeda adag oo ah inay garab taagan tahay dowladda iyo shacabka walaalaha ah ee Qatar, iyadoo sheegtay in Soomaaliya ay si buuxda uga soo horjeedo dhammaan noocyada tacaddiyada iyo duullaannada sharci darrada ah ee lagula kaco dowlad madax bannaan.
