Diyaaradahan ayaa 33 sano kadib si rasmi ah u howlgali doona mudo laba bilood gudahood ah, sida uu warbaahinta u sheegay Wasiirka Wasaaradda Gaadiidka iyo Duulista Hawada Xukuumadda Fedaraalka Soomaaliya Maxamed Faarax Nuux, waxaana heshiiska lagu soo iibiyey diyaaradahaan maanta lagu saxiixay Xafiiska Raysal Wasaaraha Soomaaliya Xamse Cabdi Barre.
“Waxaan maanta heshiis kala iibsi ah la bilownay shirkad la yiraahdo Lima Air Group, waxaan ka iibinay laba diyaaradood oo ah Airbus A320. Shirkadahaas waxay howl-gelin doona muddo laba bilood ah, heshiiskaasi maanta ayuu kusoo gaba-gaboobay magaalada Muqdisho, xafiiska Ra’iisul Wasaaraha” ayuu yiri Wasiirka Gaadiidka iyo Duulista Hawada Maxamed Faarax Nuux.
Wasiir Nuux ayaa tilmaamay in heshiiskaan maanta la saxiixay uu soo socday mudo dheer, islamarkaana uu bilow u yahay qorshe ay dowladda Soomaaliya ku soo iibsaneyso diyaarado rakaab oo casri ah si loo horumariyo Shirkadda Somali Airlines.
“Go’aanka dowladda waa in arrintaan bilow tahay, diyaaradaha waxaan u gadi doonaa oo ku xigaya laba illaa saddex kale, waxaa dooneyna in mudo kooban ay diyaaradda Somali Airlines la tartanto adeegyada caalamiga ah” ayuu yiri Wasiir Gaadiidka Duulista iyo Hawada Soomaaliya Maxamed Faarax Nuux.
Ugu dambeyntii dib u howlgalinta Shirkaddii Soomaali Airlines dhowr iyo sodan sano kadib ayaa ah mid dowladda iyo Shacabka Soomaaliyeed uga dhigan guul wayn.
