Somaliland: Askari Booliis Ah oo Lagu Dilay Magaalada Gabilay

 

Arbaco, January 8, 2025 (HOL) – Askari ka tirsan Ciidanka Booliiska Somaliland, gaar ahaana qaybta nabadgalyada wadooyinka, ayaa shalay galab lagu dilay magaalada Gabilay.

Askariga la dilay oo lagu magacaabi jiray Buux Ismaciil Mirre, ayaa markii la dilay kasoo baxay Jaamacadda Timada Cadde ee magaalada Gabilay, oo uu wax ka baran jiray isla markaana uu imtaxaan ku lahaa.

Cabdi yusuf, oo ay isku fasal ahaayeen ayaa sheegay in uu baabuurkiisa kusii qaaday abaaro 4:30 galabnimo, si ay u galaan imtaxaanka, kadibna ay kasoo baxeen 5:30 galabnimo, lakiin Buux aanu soo raacin oo uu u sheegay in uu soo lugaynayo kadibna la dilay intii uu dhexda soo socday.

“Imtixankii waxaanu ka soo baxnay 5:30 kadibna wuxuu igu yidhi iska tag aniga iyo inamo kale ayaa soo lugaynayna,  subxanala sacaada ka buuxday dhexda markan soo marayay ayaa la ii sheegay in la togtay Alle ha u naxaristo” ayuu yidhi Yuusuf.

Xakiin Furre, oo ay aqoon isku lahaayeen Buux, ayaa bartiisa Facebook ku baahiyay in Buux uu asxaabtiisa u sheegay in ay nin bajaajle ah is laayeen ka hor intii aanu jaamacada iman, isla amarkaana uu doonayay in uu xidho lakiin uu imtaxaanku kasoo gaadhay oo aanu wakhtigu u saamixin.

“Waxa uu u sheegay midka mid ah ardayda in ay nin bajaajle ah islaayeen, isla markaaana uu doonayay in uu xidho lakiin uu wakhtiga imtaxaanku kasoo gaadhay” ayuu yidhi Furre.

Ninka askariga dilay ayaa isla markiiba goobta ka baxsaday, waxaana ku raadjooga Ciidamada Booliiska Gobolka Gabilay.