Madaxweyne ku xigeenka Puntland, Ilyaas Cismaan Lugatoor ayaa hadalkaan ka sheegay shir ay yeesheen Golaha Wasiirrada Puntland oo looga hadlayay arrimo ay ka mid yihiin amniga guud, iyo la dagaalanka argagixisada.
Golaha Wasiirada ayaa bogaadiyay ciidamada difaaca Puntland oo ay sheegeen inay ku guuleysteen inay iska caabiyaan weerar ay Daacish ku soo qaadeen deegaanka Dharjaalle, kaasoo ay ku lug lahaayeen kooxo Ajaanib ah.
Madaxweyne ku xigeenka Puntland ayaa xaqiijiyay inay ka go’an tahay sii wadida dagaalka ka dhanka ah argagixisada, iyagoo taageero ka helaya dowladda iyo shacabkaooda.
Waxa uu hoosta ka xariiqay in Puntland ay qayb ka tahay dadaallada caalamiga ah ee lagu ciribtirayo kooxaha argagixisada ah sida Daacish, kuwaas oo weerarro ka geysta caalamka oo dhan.
Lugatoor ayaa ku baaqday in la iska kaashado la dagaallanka argagixisada, wuxuuna ku booriyay dhammaan ummadaha iyo bulshada in ay u midoobaan joojinta xagjirnimada iyo argagixisada.
Maalintii talaadada ayay ahayd markii kooxda Daacish ay weerar kusoo qaaday tuulada Dharjaalle ee gobolka Bari, halkaas oo ay ku dileen 22 katirsan ciidamada Puntland iyo dhaawacyada tiro intaas ka badan.
Weerarkaan ayaa waxaa fuliyay 12 dagaalame oo ajaanib ah, kuwaas oo adeegsanayay baabuur walxaha qarxa lagasoo buuxiyay.
