Wasiir Fiqi ” Mucaaradka ha u diyaar garoobaan Doorasho Qof iyo Cod”

 

Arbaco, January 15, 2025 (HOL) – Wasiirka Arrimaha Dibadda ee Xukuumadda Fedaraalka Soomaaliya Axmed Macalim Fiqi ayaa ka falceliyay Shirkii jaraa’id ay sida wadajirka ah ay shalay Magaalada Muqdisho ugu qbateen Madaxweynihii hore ee Soomaaliya Shariif Sheekh Axmed, Xildhibaan Cabdiraxmaan Cabdishakur iyo Prof. Cabdi Ismaacil Samatar oo kamid ah senatorada aqalka sare ee Baarlamaanka Soomaaliya, waxaana uu falcelintiisa ku sheegay inay Mucaaradka ay u diyaar garoobaan ka qeyb galka Doorasho Qof iyo Cod ah.

Wasiir Fiqi ayaa falcelintaan waxa uu la wadaagay dadka adeegsada Baraha Bulshada isagoo barta uu kuleeyahay Facebook kusoo qoray sidaan; “Barlamaanka ay Seddexdaan oday ka tirsan yihiin ayaa ansixiyey Doorashada ay ka cabanayaan, Guddiga doorashada madaxa banaanna maalmaha soo socda in ay ku dhawaaqi doonaan Jadwalka Doorashada ayay inoo sheegeen.! Malaha ayadaa laga hordhacayaa.!”

Wasiir Fiqi ayaa tusaale ahaan usoo qaatay diidmada Mucaaradka ee nidaamka Doorashada iyo dhaliisha ay kala dul dhaceen Madaxweyne Xasan Sheekh isagoo tilmaamay in Sanado ka hor ay madaxweynihii hore ku eedayn jireen doorasho diid, haddana ay madaxweynahaan ku eedaynayaan doorasho qof iyo cod ayuu qabanayaa (doorasho Doon).

Wasiirka Arrimaha Dibadda Soomaaliya Axmed Macalim Fiqi ayaa ku micneeyay hadalada kasoo yeeraya Mucaaradka “tiiha siyaasadda” oo ku fasiray cudur siyaasadeed oo ay qofka isaga qaldanto waxa uu rabo iyo waxa uu diidan yahay.

Waxa uu qoraalkiisa kusoo gunaanuday Wasiir Fiqi inuu ugu baaqay Mucaaradka inay Doorasho isku diyaariyaan oo xisbiyada la howlgaliyo.