Kooxaha dab damiska ah ayaa wali si xoogan ula tacaalaya sidii ay u damin lahayeen dabka marba marka ka sambeysa sida aadka ah ugu sii faafaya magaaladaas.
Dab damiska dalka Mareykanka ayaa xoogga saaraya laba dab oo waa weyn oo ka ololaya Galbeedka iyo Bariga magaaladaas, ka hor inta aysan bilaaban dabeylo laga cabsi qabo iney uga sii daraan ololka dabka hada socda oo la sheegay iney kusoo wajahan yihiin Los Angeles.
Guddoomiyaha gobolka California Gavin Newsom ayaa sheegay in ugu yaraan dadka ku dhintay dabkaan ay gaarayaan 24 ruux ayna ku basbeeleen in ka badan 12 kun oo guri, halka ay ku barakaceen dad gaaraya 100,000 oo qof.
Xaafadaha uu dabka sida weyn u baab’iyay waxaa dagana oo guryo qaali ah ku lahaa shaqsiyaad si weyn looga dhex yaqaano dalka Mareykanka iyo guud ahaan caalamka, waxana daminta dabkaan ku howlan diyaaradaha iyo gaadiidka dab damiska dalkaas.
Ugu dambeyntii guddoomiyaha gobolka California Newsom oo la hadlaayay telefishanka NBC News ayaa dabkan ku tilmaamay inuu yahay mid u muuqdo masiibo dabiici ah tii ugu xumeyd ee soo marto taariikhda dalka Mareykanka, marka loo fiiriyo khasaaraha hantiyeed ee uu geystay.
