Qoraal kasoo baxay Wasaaradda Arrimaha Dibadda Itoobiya kadib kulanka dhexmaray Wasiirka Arrimaha Dibadda Itoobiya, Gedion Timotheos, iyo Wasiir Ku-xigeenka Arrimaha Dibadda Turkiga, Burhanettin Duran, ayaa lagu sheegay in dhinacyadu ay isla soo qaadeen wadaxaajoodyadii farsamo ee lagu balamay.
“Labada dhinac waxay is-weydaarsadeen aragtiyo ku saabsan wadaxaajoodyada farsamo ee soo socda ee la xidhiidha hirgelinta Bayaan-kii Ankara,” ayaa lagu yidhi qoraalka kasoo baxay Wasaaradda Arrimaha Dibadda ee Itoobiya.
Bayaanka Ankara ayaa dawo u noqday xiisad ku dhowaad sannad ka dhex taagnayd dowladaha Itoobiya iyo Soomaaliya, kadib heshiiskii is-afgarad ee dhexmaray Somaliland iyo Itoobiya kaasi oo dhigayay in Somaliland ay marin badeed siiso Itoobiya , Itoobiyana ay Somaliland aqoonsato, heshiiskaas oo Soomaaliya ay ku tilmaantay xadgudub ka dhan ah madaxbannaanideeda.
Bayaankan oo soo baxay kadib kulamo is-xigxigay oo uu gadhwadeen ka ahaa Turkigu, ayaa lagu heshiiyay in la bilaabo kulamo farsamo oo horseed u noqon doona heshiis buuxa oo labada dal dhex mara, kuwaas oo laga rajo qabo in ay bilaabmaan horraanta sannadkan 2025.
Bayaanka ayaa lagu sheegay in labada waddan uu midba midka kale ixtiraamo madaxbannaanidiisa, in Soomaaliya ay ogolaato in ciidamada Itoobiya ay kasii mid ahaadaan Hawlgalka Midowga Afrika ee Soomaaliya, iyo in Itoobiya la siiyo marin badeed iyada oo aan la dhaawacayn madaxbannaanida Soomaaliya.
