Wararka ayaana sheegaya In Al-Shabaab iyo ciidamada dowladda uu dagaal culus uu ku dhexmaray gudaha Degmada Balcad sida dadka deegaanka ay sheegeen, Saacado waxaa la maqlaayay daryanka hubka culus oo labada dhinac ay is waydaarsanayeen.
Wararka qaar ee la helaayo ayaa sheegaya in dagaalamayaasha Al-Shabaab ee weerarka soo qaaday ay gudaha u galeen xarunta degmada Balcad iyo saldhiga Booliska.
Sidoo kale dadka deegaanka ayaa sheegay in Ciidanka dowladda iyo Al shabaab uu dagaal kale uu ku dhexmaray Buundada laga soo gelo Magaaladaas waxaana la isku adeegsanaya hubka culus.
Wararka aynu xiligaan ka heleyno gudaha magaalada ayaa kusoo waramaya in Al shabaabkii Degmada soo weerartay dib looga ceeriyay, waxaana wararku ay sheegayaan in Ciidamada Dowladda ay garab ka heleen ciidanka Howlgalka Midowga Afrika ee AUSSOM.
Dhowr jeer ayay sidaan oo kale ay Al shabaab u weerartay Degmada Balcad, waxaana weerarkaan uu imaanaya iyadoo gobolka Shabeellaha Dhexe uu ka socdo howlgallo Kooxda looga ciribtiraayo Soomaaliya.
