Ilo diblomaasiyadeed ayaa sheegaya in Kenya oo ay saamayn ku yeesheen xiisadaha ka taagan gobolka Gedo ay waddo qorshe keeni kara kulan fool-ka-fool ah oo dhex mara Madaxweyne Xasan Sheekh iyo madaxweyne Axmed Madoobe.
Dhexdhexaadintan ayaa imaanaysa iyadoo dalka uu wajahayo khilaaf ka taagan wax ka beddelka lagu sameeyay qodobo kamid ah dastuurka iyo habka doorashada. Khubarada la socda arrimaha Soomaaliya ayaa ka digaya inay tallaabooyinkan wiiqi karaan xasilloonida nidaamka federaalka.
Warar soo baxay toddobaadkan ayaa sheegay in labada hoggaamiye ay dhawaan ku wada hadleen taleefan, balse madaxtooyada Soomaaliya ayaa sheegtay in wararkaas ay yihiin “been abuur.”
Masuuliyiin ka tirsan maamulka Jubbaland ayaa xaqiijiyay in Kenya ay doonayso dhexdhexaadinta, hase yeeshee weli aysan ka helin aqbalaad labada dhinac Villa Soomaaliya. Waxay ku eedeeyeen Villa Soomaaliya inay faafinayso warar marin habaabin ah oo lagu jahwareeriyo shacabka.
Iyadoo doorashooyinka dalka uga harsan yihiin wax ka yar laba sano, falanqeeyayaasha siyaasadeed ayaa sheegaya in heshiis iyo is-afgarad dhex mara dowladda federaalka iyo Jubbaland uu muhiim u yahay xaqiijinta hannaan doorasho oo lagu kalsoonaan karo.
