Axad,
Qaraxa ayaa dhacay wax yar uun ka hor xili uu gudbay gaarigii uu la socday gudoomiyaha gobalka Hiiraan, waxaana intaas kadib bilaabatay Rasaas xoog leh oo ay ridayeen Ciidamada ilaalada u aheyd guddoomiyaha oo markii dambena dilay Nin rayid ah oo goob ganacsi ku lahaa agagaarka halka qaraxu ka dhacay.
Saraakiil ka tirsan Ciidamada Dowladda Federaalka oo gaaray goobta qaraxu ka dhacay ayaa sheegay in ay heleen waxyaabihii ka haray Miinada la qarxiyay oo dhan sida ay hadalka u dhigeen (Hal kiilo) iyaga oo intaas ku daray in sidoo kale ay arkeen fiilooyin daadsanaa aga-gaarka halka Miinada lagu aasay oo muujineysa ayeey sheegeen Saraakiishu in qaraxu ahaa mid gacanta laga hagayay.
Ilaa hadda ma jiro wax war ah oo ka soo baxay dhinaca maamulka oo ku aadan isku daygii la doonayay in lagu qaarajiyo Guddoomiyaha gobalka Hiiraan, waana markii ugu horeysay oo Mas’uul ka tirsan maamulka sare ee gobalka lagu qaado weerar la mid ah kii habeenimadii xalay lagu beegsaday gudoomiyaha gobalka oo dhawaanahan si weyn ugu mashquulsanaa howlo la xiriira sugida Nabad-galyada iyo bur burinta goobihii sida sharci darada ah loo dagay 16kii sano ee la soo dhaafay.
Dhanka kale waxaa xusid mudan in halka qaraxii xalay ka dhacay oo ahayd ilinka hore ee guriga ay degan yihiin Mas’uuliyiinta Hay’adaha MSF-Swiz ee maamusha Isbitaalka guud ee Magaalada Beledweyne.
C/raxmaan diini, Hiiraan Online
