Jimco, September 21, 2007(HOL): Isbaheysiga la magac baxay Dib u xoreynta Soomaaliya ee dhawaan looga dhawaaqay Magaalada Asmara ee Dalka
Afaheyeenka Shirkii Asmara Sakariye Maxamuud Xaaji Cabdi ayaa sheegay in Isbaheysigooda uu sameynayo wax kasta oo ay Ciidamada Itoobiya uga saarayaan Soomaaliya, wuxuuna caddeeyay in ay baahinayaan Kooxaha Iska caabinta ah ee ku sugan Muqdisho, “Dad ayaan mar hore u dirnay gudaha Soomaaliya”ayuuna yiri Sakariye Maxamuud Xaaji Cabdi.
Isbaheysiga Dib u xoreynta Soomaaliya oo todobaadkii hore looga dhawaaqay magaalada Asmara ee Dalka Eritrea ayaa wuxuu leeyahay Gole dhexe oo ka kooban 191 xubnood, Guddoomiye Guddi Fulin iyo Guddoomiye Gole dhexe, kuwaasi oo kala ah Shiikh Shariif Shiikh Axmed iyo Shariif Xasan Shiikh Aadan.
Sidoo kalena Isbaheysigan ayaa wuxuu leeyahay Astaan gaar ah oo ah Calanka Soomaaliya oo lagu daray labo Waran oo is-cuskan, Caleemo iyo Kitaabka Qur’aanka oo dusha ka saaran. Bashiir Yuusuf Xirsi oo ka mid ah Isbaheysigaas ayaa sheegay in Warmaha ay u taagan yihiin dagaalka loo gelayo xoreynta Soomaaliya, halka caleemahana uu tilmaamay in ay astaan u yihiin Nabad iyo Barwaaqo.
Si kastaba arrintu ha ahaatee, Isbaheysiga Dib u xoreynta Soomaaliya ayaa waxaa wada dhisay Maxkamadihii Islaamka, Xubnaha la baxay Baarlamaanka Xorta ah, Xubno ka tirsan Bulshada Rayidka iyo weliba xubno ka yimid Jaaliyadaha Soomaaliyeed ee ku dhaqan Dalka Dibaddiisa.
Salaad Iidow Xasan (Xiis), Hiiraan Online
