Talaado,
Wasiirka Arrimaha Gudaha Xukuumadda Federaalka Soomaaliya Maxamed Maxamuud Guuleed Gacmadheere oo shir jaraa’id ku qabtay Xafiiskiisa Muqdisho ayaa sheegay in Dadka gurmadka u baahan ay waxyeello ka soo gaartay Faraahado, Abaaro, Colaado iyo Cudurro ka dilaacay Soomaaliya, wuxuuna carrabka ku dhuftay in dadkaas haddii aan gurmad deg deg ah lala gaarin ay noloshooda halis ku jirto.
Wasiirka waxaa uu sheegay in Gargaarka Dadkaas uga yimaada dhinaca Beesha Caalamka uu yar yahay , sidaas darteedna ay codsaneyso Dowladda Federaalka Soomaaliya in gargaarkaas la kordhiyo, lana de-dejiyo.
Dadka gurmadka u baahan ayaa waxay ku sugan yihiin Gobollada Bay, Bakool, Gedo, Jubbooyinka, Shabeelooyinka iyo weliba Gobolka Banaadir oo meelo ka mid ah ay ku sugan yihiin Dad ka barakacay gudaha Magaalada Muqdisho.
Wasiirka Arrimaha Gudaha Xukuumadda Federaalka Soomaaliya ayaa wuxuu shaaca ka qaaday in Dowladdiisa aysan awood u lahayn in ay maareyso dhibaatooyinka dhinaca Bani’aadannimada ah ee ka jira Soomaaliya, sidaas darteedna wuxuu mar kale ka codsaday in gurmad deg deg ah lala soo gaaro dad ku dhibaateysan gudaha Soomaaliya.
Si kastaba arrintu ha ahaatee, Baaqa ay maanta sii deysay Dowladda Federaalka Soomaaliya ayaa wuxuu ku soo beegmayaa iyadoo Hay’adaha Qaramada Midoobay ee qaabilsan Cuntada, Caafimaadka iyo Qaxootiga ay sheegayaan in Dad tiro badan oo Soomaali ah oo ku sugan gudaha Soomaaliya ay u baahan yihiin gurmad deg deg ah, inkastoo Hay’adaha gurmadka la warsanayo ay sheegayaan in ay u baahan yihiin Damaanad-qaad Dhinaca Ammaanka ah.
Salaad Iidow Xasan (Xiis), Hiiraan Online
