Khilaafka Gobolka Sool ee u dhaxeeya Somaliland iyo Puntland muxuu daarran yahay?

Isniin 22 October 2007 (HOL)- 7, December 2002 ayay ahayd markii M/weyne Rayaale iyo Wefti uu hogaaminayay oo ku sugnaa Magaalada Laascaanood ee Gobolka Sool ay siday wararku sheegeen weerar ku soo qaadeen Ciidamo daacad u ah Maamulka Puntland. Halkaas oo uu dagaal ku dhex maray iyaga iyo Ilaaladii M/weyne Rayaale, kuwaas oo dhimasho iyo dhaawacba soo kala gaadhay labada dhinac. Taasina waxay kalliftay in Weftigii M/weyne Rayaale uu ka soo baxo Magaalada Laascaaanood, isla markaana wuxuu muddo ka dib amar ku soo rogay M/weynuhu in Ciidanka Somaliland laga soo saaro Magaalada Laascaanood iyo deegaamo kale oo ka tirsan Gobolka Sool. Waxa kale oo uu M/weyne Rayaale intaa ka dib waqtiyadii Doorashooyinka Somaliland Xaalad deg-deg ah ku soo rogay Gobolkaasi, marka laga reebo Degmada Caynaba ee isla Gobolkaas.

Inkasta oo weerarkaa ka hor uu jiray sheegashada ama muranka labada dhinac ee Gobolkaasi Sool, haddana amaradaa kala dambeeyay ee uu M/weyne Rayaale soo saaray, ayaa waxa dadka arrimaha Siyaasadda u dhuun-daloolaa ay ku macneeyaan mid hoosta ka xarriiqay, isla markaana hirgeliyay muran hor leh oo aan hore u jirin.

Waxay muddo sidaa ahaataba 29/10/2004, maalin Jimce oo ku beegan Ramadaan-tii saddexaad, goor makhribnimo, ayaa mar kale Ciidamada Somaliland iyo Puntland wuxuu dagaal ku dhex maray Abeesalay, oo dhacda duleedka Magaalada Laascaanood. Iyada oo mar kaliya lagu war helay sanqadha Rasaasta ay labada dhinac isweydaarsanayeen. Khasaare kasta oo ka yimidba dagaaladaas, muddo ku beegan saddex sanno ayay Ciidamada labada dhinac isku hor fadhiyeen jiido aan sidaa u kala durugsanayn. Hase ahaatee, maalintii Isniintii toddobaadkii hore oo ku beegnayd 15 October 2007, ayaa mar kale dagaal ka dhex qarxay Ciidamada labada dhinac. Taas oo dagaal laysu adeegsaday noocyada kala duwan ee hubka, ka dib ay gacan ku-hayntii Magaalada Laascaanood iyo badi Gobolka Sool la wareegeen Ciidamada Somaliland, inkasta oo dhawaaqyada ka soo yeedhaya Maamulka Puntland ay sheegayaan inaanay wali ka wada bixin gobolka. Dadweynaha ku dhaqan Magaalada Laascaanood ayaa qaar ka mid ahi waxay bilaabeen qax ay u qaxayaan meelo kala duwan, ka dib markii ay la soo deristay cabsi ku wajahan in mar kale dagaal dib uga qarxo Magaalada.

Isku soo wada duuboo, dad badan ayaa isweydiin kara, maxay daarran tahay amaba ujeedada ka dambaysa dagaalkani uu yahay? Dadka qaar ayaa u arka mid labada dhinac ee Somaliland iyo Puntland ay ku baratamayaan dano siyaasadeed, dadka qaarkiina waxay u arkaan mid ay Somaliland xaq u leedahay maamulka Gobolka, oo Juquraafi ahaan ka tirsan yahay. Halka dadka qaarna ay ugala muuqato mid ay gobolkan Maamulka Puntland hayb ahaan raacsan.

Si kastaba ha ahaatee, Somaliland ayaa waxay ku taagan tahay in Juquraafi ahaan waqtigi Isticmaarku kala xadeeyay Xuduudaha dalalka ay xad ahaan Gobolka Sool ka tirsan yahay, dadka ku dhaqanina uu yahay kuwo reer Somaliland ah. Hase ahaatee, dhinaca kale ee ka soo horjeeda ee Puntland ayaa iyana ku andacnoonaya in hayb ahaan dadka ku dhaqan gobolkani raacsan yihiin oo ay ku abtirsadaan Puntland, sidaa darteed ay xaq u leeyihiin maamulkiisa.

Guntii iyo geba-gebadii Beesha Caalamka ayaan si rasmi ah uga hadlin arrintan, marka laga reebo in yar oo ka mid ah oo ugu baaqday labada dhinac inay arrinta ku soo dabbaalaan nabad iyo wada-xaajood.

Barkhad M. Kaariye,  Hiiraan Online

kaariye104@hotmail.com

Hargeysa, Somaliland .