Safaaradda Soomaaliya ee Kenya oo Deeq Raashin ah gaarsiisay Dad ka barakacay Muqdisho oo ku sugan Xadka u dhaxeeya Soomaaliya iyo Kenya

Khamiis, October 11, 2007(HOL):  Safaaradda Soomaaliya ay ku leedahay Dalka Kenya ayaa maanta waxay deeq raashin ah gaarsiisay Dad ka barakacay magaalada Muqdisho oo ku sugan xadka u dhaxeeya Soomaaliya iyo Kenya, gaar ahaan Degmada Dhoobley.

Danjiraha Soomaaliya u fadhiya Kenya Maxamed Cali Ameerika ayaa Dadkaas gaarsiiyay Deeq Raashin ah oo gaareysay 23 Tan, taasi oo Dadkii loo qeybiyay ay aad ugu farxeen.

“Deeqdan oo ka kooban raashin noocyo kala duwan leh waxay gaareysan

23 tan, waxaana ugu talagalnay Dadka ka barakacay Soomaaliya ee ku sugan Xadka u dhaxeeya Soomaaliya iyo Kenya”ayuu yiri Maxamed Cali Ameeriko oo sheegay in Deeqdaas ku wareejiyeen Guddoomiyaha Degmada Dhoobley Cali Xuseen Nuur iyo Odayaasha Deegaankaas.

Deeqdan ayuu sheegay Safiirka in ay iska soo uruuriyeen Ganacsartada Reer Kenya, gaar ahaan kuwa Nariobi ku dhaqan, kuwaasi oo uu sheegay in ay ka damqadeen dhibaatada heysata dadka ka soo barakacay gudaha Soomaaliya ee ku sugan Xadka u dhaxeeya Labada Dal.

Safiirka waxaa socdaalka uu ku tegay Xadka Soomaaliya iyo Kenya ku wehliyay Saraakiil ka socotay Dowladda Kenya iyo weliba Saxafiyiin isugu jiray kuwo gudaha ah iyo kuwo Caalamka ka socday.

Ugu Dambeyntiina, Danjiraha Soomaaliya u fadhiya Dalka Kenya Maxamed Cali Ameerika ayaa mar dhawaan loo dhaarinayay xilka Safiirnimo waxaa uu ballanqaaday in uu wax ka qaban doono xaalad nolol xumo ah oo ay ku sugan yihiin Dad badan oo Soomaaliyeed oo ku dhibaateysan Xadka u dhaxeeya Soomaaliya iyo Kenya.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia