Khamiis,
Wasiirka ayaa dhaawacmay kadib markii ay ilaalada Guddoomiyaha Baarlamaanka rasaas huwiyeen gaari uu watay Wasiirka oo marayay meel u dhow Guriga Guddoomiyaha, inkastoo dhaawaca soo gaaray Wasiirka uu yahay mid fudud.
Wasiirka qudhiisa oo wax laga weydiiyay sida ay xaaladdiisa caafimaad tahay ayaa waxaa uu sheegay in uu wanaagsan yahay, isla markaana uu dhaawac fudud ka soo gaaray lugta bidix.
Ilaalada Guddoomiyaha Baarlamaanka ayaa rasaasta ku furay Wasiirka kadib markii ay ka shakiyeen gaari uu watay oo ku soo dhawaaday Guriga Guddoomiyaha Baarlamaanka Shiikh Aadan Madoobe, iyadoo rasaaseyntaasna ay ku soo beegantay waxyar kadib markii qarax xooggan lala beegsaday Xero ay ku sugan yihiin Ciidamo Itoobiyaan ah oo Magaalada Baydhabo ku taala.
Wasiirka ayaa la sheegay in markii la rasaaseynayay uu doonayay in uu deegaan ka sameysto guri u dhow Guriga Guddoomiyaha Baarlamaanka, isla markaana uu halkaas iska aaday iyadoo aan la wargelin Ilaalada Guddoomiyaha Baarlamaanka oo heegan ku jiray.
Magaalada Baydhabo oo ay haatan ku sugan yihiin madaxda ugu sareysa Dowladda Federaalka ayaa waxaa lagu arkayaa Ciidamo aad u tiro badan oo aan horay loogu arki jiray, waxaana la sheegayaa in ay Ciidamadaas yihiin kuwo sugaya Ammaanka Madaxda sare ee Dowladda oo qaarkood uu khilaaf u dhaxeeyo.
Salaad Iidow Xasan (Xiis), Hiiraan Online
