Madaxweyne Rayaale oo la kulmay Wafdi ka socday Dalka Malaysia

Axad, 4 November 2007 (HOL)- Madaxweynaha Somalilland Mudane Daahir Rayaale Kaahin, ayaa xalay xarunta madaxtooyada ku qaabilay wefti ka socda  dalka Malaysiya oo booqasho  gaaban ku yimid Somaliland.

Sida lagu sheegay warsaxaafadeed uu ku saxeexanyahay afhayeenka Madaxtooyada Siciid Cadaani Mooge, wefdigan oo ka kooban Shan qof waxaa hogaaminayay wakiilka Somaliland u fadhiya dalka Malaysiya  Aziz bin Mustafa , wuxuuna Afhayeenku ku sheegay ujeedada ay Wafdiga ku yimaadeen Somaliland in looga dan leeyahay sii xoojinta  iyo wax wada qabsiga ka dhexeeya labada wadan  Somaliland iyo Dalka Malaysiya, gaar ahaan dhinacyada Ganacsiga iyo Maalgashiga.

Warsaxaafadeedku waxa uu intaa ku daray in Madaxweynaha JSL Mudane Daahir Rayaale Kaahin uu wefdiga  uga waramay markii uu ku qaabilay Qasriga Madaxtooyada duruufihii kala duwanaa ee  Somaliland ay soo martay  tan iyo 1991-kii , markii ay qaranimadeeda kala soo noqotay wadankii la isku odhan jiray Soomaaliya, iyo heerka ay Maanta marayso , kaas oo ay ku gaadhay  dedaalka  iyo fir fircoonaanta shacbiga Somaliland , iyada oo aan wax kaalmo ah ka helin caalamka  intiisa kale .

socdaalka Wefdiga  Malaysiya ku yimaadeen Somaliland waxa uu yahay mid la xidhiidha booqashadii dhawaan ay ku tageen dalka Malaysiya wefdigii ka socday Xukuumada JSL ee uu hogaaminayay Madaxweyne ku-xigeenka Mudane Axmed Yuusuf Yaasiin.

Wafdigu intii ay joogeen Somaliland waxay la kulmeen Madax badan oo ka tirsan xukuumada  oo uu ka mid yahay Madaxweyne ku xigeenka, Wasiirka Arrimaha Dibada , Wasiirka ganacsiga iyo saraakiil badan oo ka tirsan Xukuumada Somaliland.

Barkhad M. Kaariye, Hiiraan Online

kaariye104@hotmail.com

Hargeysa, Somaliland