Safaaradda Soomaaliya ee Kenya oo sii haye cusub loo magacaabay

Arbaco, March 28, 2007(HOL): Safaaradda ay Dowladda Soomaaliya ku leedahay Dalka Kenya aya sii haye cusub loo magacaabay, iyadoo sii hayihii hore ee Maxamed Cali Ameerika looga yeeray gudaha dalka Soomaaliya.

Wasiirka Arrimaha Dibadda Xukuumadda Federaalka Soomaaliya Ismaaciil Maxamuud Hurre Buubaa ayaa xaqiijiyay in Agaasimaha Wasiiradda Arrimaha Dibadda si KMG ah loogu dhiibay Safaaradda ay Soomaaliya ku leedahay Dalka Kenya, wuxuuna caddeeyay in sii hayaha cusub uu xilkaas sii heyn doono inta ay Dowladda Federaalka ka soo magacaabeyso Safiirkii u fadhin lahaa Kenya.

Ismaaciil Buubaa waxaa uu intaas ku daray in Safaaradda Soomaaliya ee Kenya ay tahay mid muhiim u ah Dowladda Federaalka, isla markaana loo baahan yahay in loo magacaabo Safiir halkaas si hufan uga wada howlaha ay Dowladda uga baahan tahay.

Wasiirka Arrimaha Dibadda waxaa uu beeniyay in sii hayihii hore xilka laga qaaday kadib markii ay is-khilaafeen, wuxuuna carrabka ku dhuftay in khilaaf uusan meesha soo gelin, isla markaana ay arrintaas la xiriirto sidii loo tayeyn lahaa howlaha Safaaradda Soomaaliya ee Kenya.

Hayeeshee sii hayihii hore ee  Soomaaliya u fadhiyay Saafaradda Kenya ninka lagu magacaabo Maxamed Cali Ameerika oo wax laga weydiiyay warka ku saabsan in xilkii sii hayenimo laga wareejiyay ayaa waxaa uu sheegay in aysan arrintaas waxba ka jirin, isla markaana uu isagu yahay ninka Soomaaliya u fadhiya Kenya, shaqadiisana uu sii wadan doono.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia