Arbaco,
Dagaalka oo madaafiic xooggan la isugu adeegsaday ayaa markii uu cabaar socday waxaa lagu dilay Askar Soomaali iyo Itoobiyaan isugu jira, kuwaasi oo qaarkood medkooda lagu gubay inta u dhaxeysa Isgoysyada Baar Ubax iyo Black Sea, iyadoo meydka Askari Itoobiyaan ah oo aan anigu arkayna lagu jiidayay meydkiisaWadada Wadnaha, gaar ahaan Isgoyska Aadan Cadde ee Magaalada Muqdisho.
Dadka Muqdisho saakay waxay dib u soo xusuusteen dagaalkii Muqdisho ku dhexmaray Ciidamadii US/UNOSOM, xiligaasoo Askar ka tirsanaa Ciidamadii Rangers-ka Mareykanka lagu jiiday Waddooyinka Muqdisho, walow ay Ciidamadaas iyo kuwa haatan Muqdisho ku sugan ay ku kala duwan yihiin in kuwii UNOSOM ay ahaayeen kuwo Soomaaliya u yimid howlgal rajo soo celin ah, halka Ciidamada Itoobiyaanka ah iyo kuwa Midowga Afrika ee haatan Muqdisho ku sugan ay u joogaan howlgal nabad-sugid ah.
Dhanka kalena, wararkii ugu dambeeyay ee naga soo gaaraya Dagaallada Muqdisho ka socda ayaa waxay sheegayaan in uu haatan dagaal xooggan ka socda nawaaxiga Hotellada Ramadaan, Guuleed iyo Shineemadii Puntland, iyadoo dagaalkaasina la sheegayo in uu u dhaxeeyo Ciidamada Dowladda Federaalka iyo kooxo hubeysan oo ka soo horjeeda.
Dagaalka oo weli socda dartiis ilaa iyo haatan lama sheegi karo khasaaraha rasmiga ah ee dagaalkan ka soo gaaray dadka rayidka ah, hayeeshee akhristayaasheena waxaan u ballanqaadeynaa in aan u soo gudbin doonno khasaaraha ka dhashay dagaalka maanta Muqdisho ka socda.
Askariga Itoobiyaanka ah oo la jiidayo
Salaad Iidow Xasan (Xiis), Hiiraan Online
