Ciidamada Uganda oo ka saaray Miino loo geliyay Wadada loo mari Garaoonka Diyaaradaha Muqdisho

Sabti, March 10, 2007(HOL): Ciidamada Uganda ee ku sugan Magaalada Muqdisho ayaa miino loo geliyay ka saaray Wadada isku xirta KM4 iyo Garoonka Diyaaradaha Muqdisho.

Afhayeenka Ciidamada Uganda ee ku sugan Magaalada Muqdisho Paddy Ankunda ayaa sheegay in dad dhow halka miinada la geliyay oo u dhow Isgoyska KM4  ay la soo xiriireen, sidaasna ay meesha ku tageen, kadibna ay miinadii ka saareen.

Afhayeenka wuxuu ka codsaday dadka ku dhaqan Magaalada Muqdisho in ay la shaqeeyaan, si ay gutaan waajibkooda ah soo celinta Nabadgelyada Magaalada, wuxuuna caddeeyay in haddii ay dadka wada shaqeyn ka helaan ay wax badan qaban karaan.

Ciidamada Uganda ee ku sugan magaalada Muqdisho ayaa xili ay dhawaan marayeen meel u dhow Isgoyska KM4 waxaa lala beegsaday weerar loo adeegsaday waxyaabaha qarxa, waxaana la sheegay in ay halkaas uga dhaawacmeen labo askari, halka ay ku dhinteen weerarkaas dad rayid ah oo tiradoodu toban ruux ku dhaweyd.

Ka sii horna maalintii ugu horeysay ee ay Ciidamada Uganda ka soo degayeen Garoonka Diyaaradaha Magaalada Muqdisho ayaa lagu soo dhaweeyay Madaafiic hoobiyayaal ah oo lagu tuuray Garoonka, xili ay socotay xaflad lagu soo dhaweynayay.

Magaalada Muqdisho ayaa tan iyo wixii ka dambeeyay markii ay isaga baxeen xoogaggii iyo Mas’uuliyiintii Maxkamadihii Islaamka waa uu xaalkeeda noqday mid aan caadi ahayn, waxaana ka dhaca weerarro loo adeegsanayo waxyaabaha qarxa oo lala beegsanayo fariisimada Ciidamada Dowladda Federaalka iyo kuwa kale ka socda Dowladaha Itoobiya iyo Uganda, iyadoo sidoo kale ay sii dheer yihiin dilal loo geysanayo Saraakiisha iyo Askarta ka tirsan Ciidamada Dowladda Federaalka.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia