Jimco, June 15, 2007(HOL): Dowladda Mareykanka ayaa shaaca ka qaaday in ay dhaqaale gaaraya 4 Milyan oo Doollar ay ku bixineyso Shirka Dib u heshiisiinta Soomaaliya iyo weliba horumarinta Gargaarka Bani’aadannimada Soomaaliya.
Warbixin laga soo saaray Safaaradda uu Mareykanka ku leeyahay Magaalada Nairobi ayaa lagu sheegay in Dhaqaalahaas loo marsiin doono Soomaaliya Hay’adda Qaramada Midoobay u qaabilsan Horumarinta Barnaamijyada ee UNDP, iyadoo warbixintaas lagu caddeeyay in 1.25 Milyan oo dhaqaalahaas ka mid ah loogu talagalay shirka dib u heshiisiinta Soomaaliyeed ee Muqdisho lagu qaban doono 15-ka Bisha July ee soo socota.
Safiirka Dowladad Mareykanka u fadhiya Magaalada Nairobi Micheal Ranneberger ayaa saxiixi doona 4-ta Milyan ee ay Dowladda Mareykanka ugu talagashay Horumarinta Gargaarka Bani’aadannimada Soomaaliya iyo weliba Shirka Dib u heshiisiinta Soomaaliyeed.
Warbixintan ka soo baxday Safaaradda Mareykanka uu ku leeyahay Dalka
Guddoomiyaha Guddiga loo xilsaaray Shirka Dib u heshiisiinta Soomaaliyeed Cali Mahdi Maxamed ayaa sheegay in shirka dib loo dhigay ilaa 15-ka July, wuxuuna taasi sabab uga dhigay in aan weli la dhameynin dayactir lagu hayo Xarunta Gaadiidka Booliska oo shirka lagu qaban doono iyo iyadoo weliba ay Beelaha Soomaaliyeed qaarkood ku mashquulsan yihiin soo xulashada Ergooyinkii Shirka uga qeybgeli lahaa.
Salaad Iidow Xasan (Xiis), Hiiraan Online
