Isniin, July 09, 2007(HOL): Waxaa gebi ahaanba xiran Goobaha Ganacsiga ee Suuqa Bakaaraha, iyadoo gebi ahaanba aaney jirin wax dhaqdhaqaaq ganacsi ah, iyadoo Suuqana ay ku jiraan Ciidamo badan oo ka tirsan Dowladda Federaalka.
Waddooyinka gala Suuqa Bakaaraha ayaa waxaa ku sugan Ciidamo ka amar qaata Dowladda Federaalka oo dadka gelaya iyo kuwa ka baxaya Suuqa Bakaaraha, gaar ahaan Ragga ku amraya in ay Shaararkooda kor u qaadaan, isla markaana ay baaraan alaabaha ay wataan.
Ganacsatada goobaha ganacsi ku leh Suuqa Bakaaraha ayaa iyagu waxay albaabada u laabeen goobahooda ganacsiga, iyadoo ay ganacsatada qaarkood ay guryahooda isaga laabteen, halka kuwo kalena ay horfadhiyaan iridka goobahooda ganacsiga, si haddii loo baahdo in la baaro ay u furaan.
Ganacsatada Suuqa Bakaaraha ayaa iyagu waxay maalmahan ka cabanayeen falal aan wanaagsaneyn oo kula dhaqmeen Ciidamada Dowladda Federaalka oo ay sheegeen in ay mararka qaarkood kala kulmaan dhac iyo handadaad, sidaas darteedna waxay Dowladda Federaalka Soomaaliyeed ka codsadeen in ay Ciidamadaas ka xakameyso.
Suuqa Bakaaraha ee Magaalada Muqdisho ku yaala oo ah Suuqa ugu weyn ee Soomaaliya ayaa waxaa ku xiran nolosha dad badan oo Soomaaliyeed, kuwaasi oo manaafacaadsada raashin quutul-daruuri ah oo Suuqaas looga iibyo.
Dhanka kalena, qarax ka dhacay Suuqa Bakaaraha ayaa waxaa ku geeriyooday shan ruux, todobo ruux oo kalena waa ay ku dhaawacmeen, iyadoo qaraxaasi oo ahaa Bambo gacanta laga tuurayna uu ka dhacay qeybaha Dahabka iyo Sarifka Lacagaha Qalaad ee Suuqaas.
Qaraxaas kadib ayaa waxaa goobta tegay Ciidamo ka tirsan Dowladda Federaalka, kuwaasi oo rasaas ku kala eryay dadkii halkaas ku sugnaa oo iyagu markii ay Ciidamada arkeen bilaabay in ay kala cararaan, si aysan waxyeelo uga soo gaarin rasaasta ay ridayaan.
Salaad Iidow Xasan (Xiis), Hiiraan Online
