Ciidamo Itoobiyaan ah oo hor leh oo soo degay Degmada Afgooye

Axad, February 25, 2007(HOL): Ciidamo tiro badan oo Itoobiyaan ah oo ka yimid Magaalada Baydhabo ayaa shalay iyo xalay waxay ku soo qulqulayeen Deegaano ka tirsan Degmada Afgooye ee gobolka Shabeelaha Hoose.

Warar kala duwan ayaa ka soo baxaya joogitaanka ciidamadan ee Degmada Afgooye, waxayna wararka qaarkood sheegayan in Ciidamadan la doonayo in ay wax ka qabtaan falal nabadgelyo darro ah oo ka jira deegaano dhowr ah oo ka tirsan Gobolka Shabeelaha Hoose, halka warar kalena ay  sheegayaan in ciidamadan ay xoojin u yihiin Ciidamada Itoobiyaanka ah ee ku sugan gudaha Magaalada Muqdisho.

Dad Degmada Afgooye ku dhaqan oo aan la xiriirnay  ayaa inoo sheegay in ay Ciidamadan ku amreen dadka degan guryihii Dowladda in ay isaga baxaan, iyadoo si gaar ah amar loo siiyay Dadka degan Xarunta Jaamacaddii Beeraha iyo Beerta C/raxmaan Jaamac Barre, waxaana la sheegayaa in ay Ciidamada Itoobiyaanka doonayaan in ay halkaasi  fariisimo ka sameystaan.

Imaatinka Ciidamadan ee Degmada Afgooye ayaa wuxuu ku soo beegmayaa iyadoo ay Degmadaas dhawaanahan ku sii qaxayeen dad badan oo ka cararay madaafiicda Muqdisho la isku weydaarsanayo, waxaana la soo sheegayaa in ay haatan dadkaas la soo deristay cabsi kale oo la xiriirta Ciidamada Itoobiyaanka ah ee soo degay halka ay u qaxeen.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia