Jimco, February 23, 2007(HOL): Wararkii ugu danbeeyay ee ka soo baxaya Qasaaraha dagaalkii dhawaan ku dhax-maray deegaanka Baar-magoog oo ka tirsan dhulka is-maamulka Soomaalida ee Itoobiya ayaa sheegaya in dhimashada labada dhinac mareyso ku dhawaad 20 ruux halka dhawaacuna uu intaa ka badan yahay.
Dhaawaca oo la kala dhigay isbitaalada Degmooyinka Guri-ceel iyo B/weyn ayaa qaar kood u muuqda kuwo aan xaaladoodu wanaagsaneyn, waxaana dhaqaatiirta caafimaadka gaar ahaan kuwa ka howl-gala mid ka mid ah isbitaalada la dhigay dhaawaca ay sheegayaan in hadii uu dagaalku sii socdo ay adag tahay in wax loo qabto dhawaaca maadaama hada ay la daalaa dhacayaan kuwa jiifa.
Wararka ugu danbeeya ee laga helayo goobta lagu dagaalamay ayaa sheegaya in xaaladu degan tahay iskastoo la dareemayo abaabul dagaal oo labada dhinac ah, waxaana taa bar bar socda waan waan la doonayo in labada dhinac lagu kala dhax-galo,
Maamulka Gobalka Hiiraan oo arintaa shir deg deg ah ka yeeshay ayaa waxaa ay soo saareen qodobo ku wajahan dhinacyada dagaalamaya, gaar ahaan waxaa ay ugu baaqeen labada beelood in si sharuud la’aan ah loo joojiyo dagaalada islamarkaana loo hogaasamo baaqyada ka soo baxaya wax-garadka labada dhinac.
Gudoomiye ku xigeenka maamulka Gobalka Xuseen Cumar Xasan “Gacamey” ayaa sheegay in uu jiro wal wal badan oo laga qabo in dirirtu ku soo fido dhinac gobalka maadaama labada garab ee dagalamaya yihiin kuwo wada daga gudaha gobalka, waxaana uu sheegay Gacamey in hada heegan buuxa la galiyay ciidamada nabad-galyada sid looga hortago in ay dhacaan wax yaabo qal-qal galin kara amaanka guud.
Isku qabsashada deegaanada lagu wada nool yahay waa mid qeyb ka ah khilaafyada inta badan ka dhax dhaca beelaha soomaalida, waxaana la oran karaa dagaalada ka bilaawda la haan shaha Ceel-biyood ama dhul daaqis ah yihiin kuwa ugu daran ee sababa dagaalada soo iska soo daba laabta, kuwaasoo xitaa ay adag tahay in xal buuxa laga gaaro maadaama mar walba reer miigu ku kulmayaan Ceelasha biyaha iyo waliba dhulka daaqisnka leh.
C/raxmaan Diini, Hiiraan Online
