Axad,
Dagaalkaas ayaa wuxuu qarxay kadib markii ciidamo ka tegay Magaalada Kismaayo ay tageen Degmada Jilib, halkaasi oo ay horay u sii joogeen kooxo maleeshiyooyin ah oo ay is-qoomeen ciidamada ka tegay Magaalada Kismaayo.
Dagaalka labada dhinac dhexmaray kadib ayaa ugu dambeyntii waxay magaalada Jilib gacanta u gashay Ciidamadii ka tegay magaalada Kismaayo oo la sheegay in uu hoggaaminayay Sarkaal lagu magacaabo Col. Cabdul Xiirey.
Col. Cabdul Xiirey oo ka hadlay sababta keentay in ay dagaal ka ridaan Degmada Jilib, isla markaana ay gacan ku heynteeda la wareegaan ayaa wuxuu sheegay in Wasaaradda Gaashaandhigga Dowladda Federaalka ay ku amartay Guutadooda oo ah Guutada 3aad ay xarun ka sameysato Degmada Jilib, halka Guutada koowaad ee Ciidamada Dowladdana uu sheegay in loo diray Xerada Deynuunaay ee Gobolka Bay.
Col. Cabdul Xiirey waxaa uu sheegay in maleeshiyooyinka ay ka ceyrsadeen Degmada Jilib ay ahaayeen kuwo falal burcadnimo ah ka geysanayay deegaano hoos-taga Gobolka Jubbada Dhexe, kuwaasi oo uu wax ka qaban waayay Maamulka halkaas ka jira.
Si kastaba arrintu ha ahaatee, Xiisad ka dhalata Dagaalkaas ayaa la sheegayaa in ay weli ka taagan tahay Degmada Jilib, inkastoo Odayaal deegaanka ah ay ku howlan yihiin sidii ay u baajin lahaayeen dagaal kale oo labada dhinac dhexmara..
Salaad Iidow Xasan (Xiis), Hiiraan Online
