Afar Qof oo ku dhimtay iyo tiro kale oo ku dhaawacantay Shil gaari oo ka dhacay duleedka Boosaaso

Isniin, August 27, 2007(HOL): Afar Qof ayaa dhintay, 5 kalena waa ay dhaawacmeen kadib markii uu shil gaari ka dhacay meel ku talaa duleedka magaalada Boosaaso saaka abaare 10:30-kii subaxnimo.

Shilkan baabuur ayaa ku dhacay   gaari noociisu yahay  Toyota Mark II  ah, kaasi oo ka baxay wadada Laamiga ah ee buundada Tuulada karin oo 40 KM u jirta magaalada Boosaaso.

Warar ay Shabakada warbaahinta Hiiraan Online ka heshay dad goobjoogayaal ah ayaa sheegaya in sababta uu gaarigu u dhacay ay ahayd kadib markii uu  ku sinbirixday ama ku siibtay Laamiga oo xiligaasi roob mahiiigaan ahi uu ka da’ayay.

Dadka dhintay  qaarkood waxay naftu deysay iyagoo ku soo jira dhabaha xili loola soo cararayay Hospitalka, si loola tacaalo xaaladdooda caafimaad halka qayb ka mid ahina ay ku naf waayeen isla goobtii u shilku ka dhacay, waxaana dadka dhintay ka mid ahaa wadihii gaariga.

Shilka gawaaridu beryihii ugu danbeeyay wuxuu ahaa mid si joogta oo kale uga dhacay wadada halbowlaha ah ee isku xirta deegaanda Puntland waxaana loo aneeyaa inta badan Masuuliyad daro ka timaada dhanka Dareewalada

Maxamed Axmed Maxamed (Ilka-case), Hiiraan Online

Ilkacase2010@hotmail.com

Bosaso, Somalia