Khamiis,
Weerarradaan ayaa la sheegay inay ku dhaawacmeen intala hubo ugu yaraan afar qof oo saddex ka mid ay ahaayeen ciidammada Booliiska saldhigga degmada Hodan, balse madaafiicda la isdhaafsanayay ayaa waxay sababeen burbur guryo iyo geedo ku yaalla xaafadahaas.
Weerarkii ugu horreeyay ayaa lagu qaaday saldhigga degmada Wadjifr, iyadoo la sheegay in baasuukayaal iyo sidoo kale ay dhinacyada dagaalamayay is weydaarsadeen, balse aan la sheegin wax khasaare ah oo ku dhashay.
Saldhigga Degmada Hodan ayaa isagana weerar xooggan lagu qaaday saqdii dhexe ee xalay, waxaana halkaas ku dhaawacmay saddexda askari ee ay sheegeen booliiska inay ka dhaawacmeen, iyadoo C/waaxid Maxamed Xuseen madaxa Xafiiska Xiriirka Dadweynaha iyo Saxaafadda ee Booliiska Soomaaliyeed uu sheegay in kooxihii weerarka soo qaaday ay khasaarooyinka gaareen, balse uusan sheegin inta ay le’ekaayeen.
Qaar ka mid ah shacabka daggan agagaarka saldhigga booliiska ee degmada Hodan ayaa sheegay inay muraayadihii guryaha jajabeen xoogga madaafiicda la isku dhaafsanayay korkood awgeed.
Dhanka kale, kooxo kale ayaa waxay xalay weerar xooggan ku qaadeen ciidammo ku sugnaa agagaarka isgoyska Florenza ee Degmada Wardhiigley, iyadoo la xaqiijiyay inuu ku dhaawacmay cunug yar oo la sheegay inay rasaastu ugu tagtay gurigiisa, balse aan la aqoon khasaaraha kala gaaray labada dhinac ee dagaallamay.
Salaad Iidow Xasan (Xiis) Hiiraan Online
