Markab laga leeyahay Dalka Denmark oo lagu haysatay Xeebaha Soomaaliya oo madax furasho lacageed lagu sii daayay

Khamiis, August 23, 2007(HOL): Dowladda Denmark ayaa sheegtay in markab lagu magacaabo MV Denica White iyo shan shaqaale ah oo saarnaa la sii daayay, iyagoo kooxo burcad badeed Soomaaliyeed ah gacanta ugu jiray muddo 80-maalmood ka badan.

Markabka MV Danica White iyo shaqaalihii la socday ayaa loo waday dhanka dalka Jabuuti, si ay halkaas ugula kulmaan shaqaaluhu qoysaskoodii oo ku sugaya halkaas, iyadoo maalinta soo socota ee berri ah lagu wado inuu Markabku gaaro xeebaha dalka Jabuuti.

Markabka ayaa la xaqiijiyay in lagu sii daayay lacag madax furasho ah, iyadoo lacagtaas lagu sheegay inay gaaraysa 500-kun oo Dollar, iyadoo markabkaas lagu daray markab kale oo faransiiska uu leeyahay oo ah nooca dagaalka, isla markaana goobta u yimid inuu ka badbaadiyo markabka mar kale inuu ku dhaco gacanta afduubayaal kale oo Soomaali ah.

MV Danica White; ayaa waxaa lagu qafaashay xeebaha Soomaaliya 1-dii June ee sanadkan, isagoo qalab gacansi oo kuwa dhismaha ah u waday dalka Kenya, iyadoo kooxaha qabsaday markabkaan ay dhowr jeer oo hore ku hanjabeen inay waxyeello gaarsiin doonaan shaqaalaha Markabka, balse ugu dambeyn ay ka badaadeen.

Dowladda Denmar waxay ku tilmaantay xeebaha Soomaaliya meelaha ugu qatarsan marka la eego burcad badeedda, waxaana wararku sheegayaan in Denmark ay uga digtay maraakiibteeda inay ku safraan xeebaha dalka Soomaaliya, khatarta burcad badeedda awgeed.

Salaad Iidow Xasan (Xiis) Hiiraan Online

sxiis@hiiraan.com

Mogadishu, Somalia