Isniin, October 30, 2006(HOL): Inkastoo wali uu jiro dhaq-dhaqaaqii ciidan ee ka taaganaa qeybo ka mid ah Xadka Gobalku la wadaago Dowlada Itoobiya ayaa haddana warar hoose oo soo baxaya waxaa ay sheegayaan in ay dib uga leebteen Ciidamada Itoobiya Deegaanadii markii hore ay soo buuxiyeen.
Wararka soo baxaya ayaa sheegaya in dib u gurashada Ciidamada Itoobiya iyo saraakiishii horkacayaba ay la xiriirto Khilaaf soo kala dhax galay Xubnaha Soomaalida ah ee halkaas ku wehliyay oo qaarkood ay ka mid ahaayeen Hogaamiye kooxeedyadii looga Itaal Roonaaday Dagaalkii dhaxmaray iyaga iyo dhinca Maxkamadaha oo sida wararku sheegayaan ka dalbaday ciidamda Itoobiya in ay ku wehliyaan Dagaal Maxkamadaha looga qaado dhinaca Gobalka Hiiraan, taasoo ciidamada iyo Saraakiisha Itoobiya ay ku gacan seyreen iyagoo ku wargaliyay Xubnaha Soomaalida ah in ay iyagu dagaalka galaan, laakiin dhinacooda ay ku saacidayaan wixii tasiilaad ah oo ay uga baahdaan.
Xogta arintaas ku saabsan oo isa soo tareysa ayaa dhinca kale waxaa sii xoojinaya hoos u dhaca ku yimid dhaq-dhaqaaqii ay wadeen ciiidamada Soomalida iyo kuwa Itoobiyaanka ah ee isku dhinaca ka so jeeday, iyadoo dhanka kalana ay u baahan in xisaabta lagu darsado Max’ed Cumar Xabeeb oo Wixii ka dambeeyay khilaafka la sheegayin uu soo kala dhax galay Itoobiyaanka iyo Xubaha Soomaalida ah ku laabtay Deegaanka Qurac- Joomo oo ka tirsan dhinaca Gobalka Bakool, halkaasoo uu kulamo ku la lahaa maalmahan qaar ka mid ah Raggii ay ka wada tirsanaayeen Isbaheysigii la bur buriyay ee (Ladaaglanka Argagixisada) sida Cabdi Xasan Cawaale Qeyb-diid iyo C/qaadir Beebe, oo labaduba ahaa hoggaamiyaal si weyn looga yaqiinay magaalada Muqdisho.
Dhinaca Maxkamadda Gobalka Hiiraan oo warbixintan ama Xogtan ku saabsan dib u gurashada Ciidamada Itoobiya ay wax ka weydiisay HOL ayaa iyagu ku gaabsaday in ay wali Iyagu difaac yihiin mar walbana ay isha ku hayaan sida wax u socdaan, laakiin waxaa ay intaas ku dareen in maqal uun ay ku tahay Dib u gurashada Ciidamada Itoobiya.
Meelaha sida weyn markii hore looga sheegay in ay ku sugan yihiin Ciidmada Itoobiyaanka ayaa waxaa ka mid ahaa halka lagu Magacaabo ( Burka Sariiraale) oo dadka socotada ah ee soo maraya hadda ay tilmaamayaan in aysan ku soo Arag wax Itoobiyaan ah, walow wali ay jiraan ciidamo soomaali ah oo halkaa isku urursanaya, kuwaasoo marka loo eego ciidamda maxkamada ee ka soo horjeeda aan awood badneyn.
Hoos u dhaca ku yimid dhaq-dhaqaaqii ka taagnaa dhinaca Xuduuda oo la dareemayo ayaa waxaa si weyn u soo dhaweynaya dadka ku dhaqan Gobalka oo markoodii hore Wadnaha farta ugu hayay Cabsi ay ka qabeen dagaal Faraha looga Gubto oo dhax mara Labada ciidan ee Is hor-fadhiya, laakiin
hadana lama
Marka la eego Gudaha dalka soomaaliya waxaad mooddaa in hadda loolanku u dhaxeeyo Maxkamadaha iyo Dowlada Itoobiya oo ay Maxkamaduhu ku eedeynayaan in ay yihiin kuwo wada xiisad ka bad badis ah, taasoo keentay xitaa in lagu dhawaaqo Jihaad lal galo Dowlada Itoobiya oo iyana ku mar marsiyooneysa in ay u joogto Gudaha dalka tababarsiinta Ciidamada Dowladda Federaalka.
C/raxmaan Diini, Hiiraan Online
diini@hiiraan.com
Beledweyn, Somalia
