Shirkadda Xawaaladda Amaana oo Deeqdii ugu horeysay gaarsiisay 100 Qoys oo ka mid ah kuwii ka barakacay Fatahaaddii Webiga Shabeelle uu ku sameeyay Magaalada Beledweyn

Sabti, November 18, 2006(HOL): Shirkadda Xawaalada ee Amaana laanteeda Gobalka Hiiraan ayaa markii ugu horeysay deeq loogu gurmanayo Dadkii ka Bara baxay deegaanadii ay ku noolaayeen waxaa ay gaarsiisay  Ilaa 100 Qoys  oo ku nool duleedka magaalada B/weyn.

Sida uu HOL u sheegay  Wakiilka Shirkadda ee Gobalka Hiiraan  C/shakuur  Cali Cismaan Deeqdan oo ah mid shirkaddu ugu talagashay in ay kaga qeyb-qaadato Gurmadka loo fidinayo dadka dhibaatadu saameysay  ayaa Qoyskiiba la Goostay ayuu yiri in la siiyo Raashin Maalmo ku filan Maadaaama sida uu sheegay shirkaddu aragtay baahida dadku u qabo  wax uu quuto.

C/shakuur waxaa uu intaa ku daray in  Qoyskiiba loogu tala galay  12.5  (Labo iyo toban kiilo iyo bar) oo ka kooban Bur, Bariis, Sokor iyo waliba Hal caag oo saliid ah,  waxaana uu intaa ku daray in Talaabadani tahay mid tijaabo ah,  islamarkaana ay diyaarinayaan deeqo kale oo ay ugu tala galeen dadka liita.

Deeqda oo Qoys Qoys loo gudoon siinayay 100ka Qoys ayaa la oran karaa dadka la gaarsiiyay waa kuwo si weyn ugu baahnaa  gaar ahaan marka aad eegto daruufaha ay ku nool yihiin.

Shirkada ayaa deeqday dadka ay gaarsiisay u sii marisay Mas’uuliyiinta Maxkamada islaamiga Gobalka Hiiraan oo si weyn  ugu Amaanay shirkada  sida ay isugu xilqaantay wax u qabashada dadka daruufuhu la soo darseen,  iyagoo ku booriyay in aysan ka daalin wax ka qabshada xaalada taagan u baahan gurmada nooc kasta leh.

Dhanka kale hooyo lagu magacaabo Madiino Xuseen kana mid ah dadka Tuulada Reer luubow ayaa waxaa Deeq lacageed oo dhan 100 doolar soo gaar siiyay  nin lagu magacaabo Saciid Sh. Cabdi. kadib markii uu ka daawaday  HOL sawir naxdin  lahaa oo muujinaya daruufta heysata Qoyskeeda,

Hooyadan oo aan ku booqday hoyga ay dagan tahay oo ka sameysan  cooshado ayaa  ii sheegtay in ay aad ugu faraxsan tahay deeqda soo gaartay  islamarkaana ay ugu mahad celinayso shaqsiga soo gaarsiiyay, iyadoo intaa ku dartay in dhamaan dadka wax heysta ay ka filaneyso sidaa oo kale.

Dadka ka bara Baxay Magaalada B/weyn oo iyagu xaafad gaar ah ka sameystay  Halka lagu magacaabo  Jante-kuundisho ayaa wali iyagu si Rasmi ah u helin  deeqo ku filan , Inkastoo hadana dadkaasi  siyaabo kala duwan ay noloshooda ku maareeyaan.

Wabiga Shabeele ayaa hadda marka aad eegto u muuqda mid Biyihiisu sii yaraanayaan walow hadana aysan dhaweyn in dadku dib ugu soo laabto Gudaha magaalada sababo caafimaad awgeed, taasoo xitaa marka dhan laga eego u muuqneysa in muddo dadku u sii baahan yahay kaalmo  loo fidiyo.

Hay’adaha samafalka Gobalka ayaa iyaguna wada dadaal ay doonayaan in ay mar kaliya gurmad ku gaarsiiyaan dhamaanba dadka barakacay, waxaana markii ugu horeysay  Gudaha gobalka soo gaaray deeqo kala duwan oo ka kala yimid  magaalooyinka  Nairobi iyo waliba Muqdisho oo la filayo in dhawaan la bixiyo.

C/raxmaan Diini, Hiiraan Online
diini@hiiraan.com
Beledweyn, Somalia