Baafin: Gabar Soomaaliyeed oo La La’ayahay ayaa Laga Raadinayaa Agagaarka Wabiga Mississippi

By: C/raxman Ceynte 

Jimco, May 12, 2006

Minneapolis, MN – (HOL). Booliiska Minneapolis ayaa gabar Soomaaliyeed oo la la’ayahay ka raadinaya wabiga Mississippi ee u dhow xaafadda ay Soomaalidu ku badan tahay ee Cedar. La’aanshaha gabadhan ayaa keenay su’aalo ka badan jawaabaha la hayo.

Sucdi Bashir Cabdi oo ah 26-jir takhasus caafimaad ka baraneysay Jaamacadda Hofstra ee magaalada New York ayaa markii ugu war-dambeysay lagu arkay buundada dul marta wabiga Mississippi ee Washington Avenue, halkaas oo uu qof ka soo wacay booliiska abbaarihii 3:00 a.m. (sagaal saac) aroornimadii Talaadada, una sheegay inuu arkay haweeney sii galaysa wabiga.

Booliisku dhacdadan ugama shakisna wax dambi ah, kumana dhawaaqin is-miidaamayn. Laakiin dadka Sucdi in badan yaqaannay kuma qanacsana ineey tahay qof sidan howtul-hamagga ah nafteeda u qaadeysa. Waxeeyna ka cabsi qabaan in lagu khasbay ineey wabiga isku tuurto.

Quusayaal isticmaalaya doomo qalabeysan ayaa ka goobayey Sucdi biyaha hoostooda Talaadadii iyo Arbacadii. Soomaali badan ayaa iyana ka raadinayey wabiga jiinkiisa (dhinaciisa).

“Inaan sida ugu dhakhsaha badan u helno ayaan rabnaa,” ayuu yiri Cismaan Abdulle oo Sucdi walaalkeed ah.

Sucdi waxeey hore uga qalin jabisay Jaamacadda St. Thomas ee Minneapolis, ka hor intaan loo qaadan kulliyadda caafimaadka ee Jaamacadda Hofstra. Ahalka iyo asxaabta Sucdi waxeey ku sifeeyeen qof af-gaaban oo leh yididiilooyin waaweyn.

Inkastoo aysan sii tafatirin, haddana qoyska Sucdi waxeey sheegeen ineey xoogaa ku walaacsaneyd waxbarashada, kuna daallaneyd. Fiidnimadii Isniinta ayeey Minneapolis u soo dhooftay, si ay wakhti ula qaadato qoyska.

Dhowr saacadood kadib markii la seexday ayeey qoysku ka waayeen qolkii ay jiiftay, kadibna billaabeen raadis qarracan leh. Hal kab oo Sucdi kabaheedii loo maleynayo ayaa subaxii lagu arkay meel wabiga u dhow. Waa caddeynta qura ee illaa imminka la hayo.

Booliiska iyo Soomaalida ayaa qorsheynaya ineey sii wadaan baadi-goobka, inta ruux iyo raq mid uun laga helayo.

Haddii aad wax xog ah ka hayso kiiskan, fadlan kala xiriir Waaxda Nabad Sugidda Minneapolis (612) 673-5701

C/raxman Ceynte

Hiiraan Online

Minneapolis, MN

Ceynte@hiiraan.com