Isniin,
Gaari ay la socdeen mid ka mid ah Guddoomiye ku xigeennada Degmada Yaaqshiid iyo Mas’uuliyiin kale oo maamulka Degmadaas ka tirsan ayaa waxay kooxo Bambooyin ku hubeysnaa waxay ku weerareen inta u dhaxeysa Isgoysyada Sanca iyo Afarta Jardiino, gaar ahaan agagaarka Geed Qalooc.
Weerarkaas ayaa la sheegay in aysan wax dhibaato ah ka soo gaarin mas’uuliyiinta Degmada Yaaqshiid, hayeeshee uu weerarkaas ku geeriyooday mid ka mid ah Ciidamadii ilaalinayay mas’uuliyiinta, halka afar kale oo Ciidamada ka mid ahaana ay dhaawacyo kala duwan soo gaareen.
Isla meesha maanta lagu weeraray mas’uuliyiinta Degmada Yaaqshiid ayaa waxaa dhawaan miino lagula qarxiyay Guddoomiyihii seddexaad ee Degmada Yaaqshiid Cabdi Miineey, kaasi oo dhaawac soo gaaray ugu geeriyooday Isbitaalka Keysaney ee duleedka Muqdisho.
Horayna waxaa Muqdisho lagu dilay Muxyaddiin Xasan Xaaji iyo Xaaji Cali Fiidow oo labaduba guddoomiyayaal ka ahaa Degmada Yaaqshiid, iyadoo dilkoodana ay ka dambeeyeen kooxo Bastoolado ku hubeysnaa.
Ugu dambeyntiina, ilaa 7 Guddoomiye Degmo ayaa magaalada Muqdisho lagu dilay tan iyo markii la magacaabay maamulka Gobolka Banaadir ee uu Guddoomiyaha ka yahay Maxamed Cumar Xabeeb (Maxamed Dheere), waxaana guddoomiyayaasha la dilay ay madax ka ahaayeen Degmooyinka Huriwaa ( 2 Guddoomiye), Yaaqshiid (3 Guddoomiye), Howl-Wadaag, iyo Shibis.
Salaad Iidow Xasan (Xiis), Hiiraan Online
