Axad,
Afhayeenka waxaa uu sheegay in ay Kooxo hubeysan oo ka tirsan Xarakada Al-Shabaab ay weerareen Saldhigga Degmada Hodan, hayeeshee sida uu yiri ay iska caabin kala kulmeen Ciidamadii Saldhigga ku sugnaa.
C/llaahi Ibaahim Shacshac waxaa uu intaas ku daray in aysan jirin wax khasaare ah oo dagaalkaas ka soo gaaray Saldhigga iyo weliba Ciidamada ku sugan, wuxuuna carrabka ku dhuftay in ay kooxihii weerarka ku soo qaaday dib uga laabteen kadib markii ay ku guuleysan waayeen in ay Saldhiggaas la wareegaan.
Kooxo hubeysan oo ka soo horjeeda Dowladda Federaalka iyo joogitaanka Ciidamada Itoobiya ee dalka Soomaaliya ayaa waxay dhowr jeer oo hore qabsadeen Saldhiggaas, inkastoo aysan u suurtagelin in ay ku negaadaan.
Dhanka kalena, Xaaladda Xaafadaha Degmada Hodan ee ay dagaalladu ka dhaceen ayaa saaka degan, inkastoo ay jiraan Dad guryahooda ka barakacaya, kuwaasi oo ka cabsi qaba in ay mar kale dushooda ku dagaalamaan dhinacyada isaga soo horjeeda Magaalada Muqdisho.
Xaafado ka tirsan Degmooyinka Hodan, Howl-Wadaag, Wardhiigley, Yaaqshiid iyo Huriwaa ayaa waxay noqdeen kuwo ay ka barakaceen Dadkii deganaa, kadib markii ay halkaas dhowr jeer ku dagaalameen Ciidamada Dowladda Federaalka oo kaashanaya Ciidamo Itoobiyaan ah iyo Kooxaha hubeysan ee ka soo horjeeda.
Salaad Iidow Xasan (Xiis), Hiiraan Online
