Isniin, September 24, 2007(HOL): Dadka dhimani waa kuwa bulshada ugu liita, waa kuwa ugu baahan, waa kuwa ugu itaalka yar, Dadkaasi tol iyo tag midna ma leh, Hadday dhaxamoonayaan ma sheegan karaan, hadday gaajoonayaan ma sheegan karaan, qaran iyo qabiil midna uma tirsana, In dadka miyirka qaba oo keli ah la daryeelaa miyaanay cuqubo iyo dulmi weyn ahayn oo laga gelayo kuwa dadka ugu liita (maanka ka jirran), Ma waxaa haboon in aynu dheregno iyagoo kuwii inoogu liitay silcayaan? Mise waxaa fiican in aynu dheregno marka kuwa inoogu liitaa dhergaan?
Hadduu maanku dheeliyo bulshoy
Waa dhantaal culuse
Ruuxii dhaqaaqaa malaha
Dhaaddan iyo muuqe
Qurux iyo dhalaal maalintaa
Wey dhanbalanyiine
Dhabarkuu ka jabay ruux xiskii
Dhaawac ka qabaaye
Alle wuu dhammayn karahayaa
Maanka dheeliyaye
Dhaayaha fayow baa xigmado
Looga dhigayaaye
Dheelkiyo qabowgaa ka hela
Debedda Dheegowe
Dhedada iyo juubaha malaha
Dhar ay ka qaataane
Intaan dhagida jiifnay iyagu
Dhaxanta meeraane
Dhuuntay gacmaha kula jiraan
Dhaxan daraaddeede
Suxulladu waxay kaga dhegeen
Dheegga feedhaha’e
Dhudhunkay miciin moodayaan
Dhilay qaboobuuye
Dharaartii cadceedduna dushay
Kaga dhacaysaaye
Dhinbiilahay ku darandooridaa
Dhamac kaliileede
Dhirta kama hadhgelayaan kulkee
Wey dhanqalanyiine
Dhuuniga la quutiyo anfaca
Dheri ma saaraane
Dhure kagama qaataan intay
Dhereg ka doonaane
Gaajay la dheeldheeliyaan
Oo la dhacayaane
Dhulka kama shaqeystaane taas
Wey ka dhimanyiine
Wax dhoofiyo wax soo dega intaba
Kuwa nimcada dhaandhaansadaa
Dhaadimaayaane
Dhawaaqaygu meeshuu yahaan
Idin dhegeysiine
Xaajadu dhab weeyee dadyahow
Dhuuxa hadalkayga
Dhibbanaha codlaawaha ah hoy
Dhaada siliciisa
Waa dhiillo culuse haddaan
Dhegaha loo jeedin
Dhagar weeye ina saaranoo
Ma aha dheeldheele
Dhiig iyo ninkii uuslahow
Dhiidhi waa halise
Maxamed Yuusuf Xaaji C/raxmaan (Keyse)
