Talaado,
Labo Qarax oo ka dhacay inta u dhaxeysa Isgoysyada Baar Ubax iyo Black Sea ayay dadkaas ku dhaawacmeen, waxaana qarax ka dhacay agagaarka Isgoysk Baar Ubax ku dhaacwacmay afar ruux oo mid ka mid ah uu ka tirsanaa Ciidamada Dowladda Federaalka Soomaaliya.
Sidoo kalena Qarax kale oo ka dhacay agagaaraha Isgoyska Black Sea ayaa waxaa uu geystay dhaawaca afar ruux oo kale, kuwaasi oo dhamaantood ahaa dad rayid ah.
Qaraxyadaas ayaa waxay ahaayeen kuwo la doonayay in lagu waxyeeleeyo Ciidamo ka amar qaata Dowladda Federaalka oo aaggaas ku sugnaa, iyadoo qaraxyadaasna la sheegay in ay ka dambeeyeen kooxo ka soo horjeeda Dowlada Federaalka iyo joogitaanka Ciidamada Itoobiya ee dalka Soomaaliya
Magaalada Muqdisho ee Caasimadda Dalka Soomaaliya ayaa muddooyinkan dambe waxaa ka dhacayay qaraxyo loo geysnayo ciidamada Dowladda federaalka Soomaaliya, iyadoo ay sii dheer yihiin weerarro habeenkii lagu qaado fariisimada Ciidamada Dowladda Federaalka iyo Ciidamada Itoobiya.
Ugu dambeyntiina Hay’adaha Ammaanka Dowladda Federaalka Soomaaliya ayaa waxay sheegaan in ammaanka Muqdisho uu yahay mid soo hagaagaya, isla markaana ay la sii wadayo howlgallada lagu sugayo ammaanka Magaalada Muqdisho.
Salaad Iidow Xasan (Xiis), Hiiraan Online
