Sabti,
Agagaarka Daarta Global oo ku taala Wadada Labaad ee Suuqa Bakaaha ayaa waxaa isku rasaaseeyay Kooxo hubeysan iyo Ciidamada Dowladda Federaalka oo halkaas socod roondo ah ku marayay, waxaana is-rasaaseyntaas kadib dhacay Qarax xooggan oo ka dhashay Bambo gacmeed ay ku tuureen kooxihii la dagaalamayay Ciidamada Booliska.
Sidoo kalena Ciidamo ka amar qaata Dowladda Federaalka oo howlgallo ka sameynayay Xaafadda Geed Jaceyl ee Degmada Wardhiigley ayaa waxaa weeraray kooxo hubeysan, iyadoo lagu soo waramayo in uu halkaas ka dhacay iska hor-imaad socday dhowr daqiiqo.
Iska hor-imaadka dhexmaray Ciidamada Dowladda Federaalka iyo kooxaha hubeysan ee ka soo horjeeda ayaa wuxuu ku soo beegmayaa iyadoo saakay Ciidamada Dowladda ay howlgallo hub iyo waxyaabo qarxa lagu baarayo ka sameynayeen inta u dhaxeysa Isgoysyada Xarar-yaale iyo Aadan Cadde ee Magaalada Muqdisho.
Si kastaba arrintu ahaatee, Magaalada Muqdisho ee caasimadda Dalka Soomaaliya ayaa tan iyo wixii ka dambeeyay markii ay gacan ku heynteeda la wareegtay Dowladda Federaalka Soomaaliya waxaa ku soo badanayay Qaraxyada, Dilalka iyo Iska hor-imaadyada u dhaxeeya Ciidamada Dowladda Federaalka iyo kuwa Itoobiya oo isku dhinac ah iyo kooxo hubeysan oo ka soo horjeeda.
Salaad Iidow Xasan (Xiis), Hiiraan Online
