Shirka Dib u heshiisiinta oo saaka dib u bilowday iyadoo qodobo cusub lagu kordhiyay Ajendayaasha looga hadlayo

Sabti, August 18, 2007(HOL): Waxaa maanta dib uga bilowday xarunta Shirka Dib u heshiisiinta Soomaaliyeed Shirweynihii Qaran ee u socday Beelaha Soomaaliyeed, kaasi oo muddo toddobaad ah ku jiray hakad  ku saabsan Arrimo Farsamo iyo codsi ay shirka u soo jeediyeen Duubabka Dhaqanka Beesha Hawiye.

 Afhayeenka Shirka Dib u heshiisiinta C/raxmaan Maxamuud Jimcaale (Shifti) ayaa sheegay in ajendayaasha maanta Shirka hor yaalla ay ugu horeyso sidii loo dhageysan lahaa qoraaladii ay xogheynta shirka soo diyaarisay muddadii shirku hakadka ku jiray, waxaana uu tilmaamay in qoraalladaasi ay soo koobayaan hadba wixii ajende iyo go’aanno oo horey shirka uga soo gudbay.

Guddoomiyaha Guddiga Shir guddoonka Shirweynaha Qaran Cali Mahdi Maxamed ayaa hore u sheegay in ergooyinka beelaha ay u madax bannaan yihiin inay wax ku daraan ama wax ka dhimaan  wixii ay xogheynta iyo guddiyadda qoraalka soo jeediyeen.

Intaas kadib Xoghaynta Shirka Dib u heshiisiinta Soomaaliyeed ayaa soo jeediyeen afar qodob oo lagu kordhiyay Ajendayaasha Shirka, kuwaasoo kala ah:

Qaxootiga iyo Dadka Soo Barakacay

Burcad Badeedka

Xuquuqda Muwaadinka iyo Dadka laga tirada badan yahay

Maqaamka Magaalo Madaxda Muqdisho

Shirka Dib u heshiisiinta Soomaaliyeed oo maanta dib la isugu soo laabtay ayaa goor dhoweyd ka furmay Xarunta Gaadiidka Booliska ee Degmnada C/Casiis ayaa la filayaa in looga hadlo saxiixa qodobadii Ergooyinka Shirka ku heshiiyeen.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia