Raashin Mucaawino ah oo ay WFP u qaadi lahayd Soomaaliya oo u xayiran Markab looga heysto Xeebaha Puntland

Isniin, March 19, 2007(HOL): Raashin mucaawino ah oo gaaraya ilaa 2,423 metric tonnes oo ay Hay’adda Cuntada Adduunka WFP ay u qaadi lahayd Soomaaliya ayaa waxaa uu ku xayiran yahay Deked ku taala Magaalada Dares-Salam ee dalka Tanzania.

Raashinkaas ayaa wuxuu u xayiran yahay sabab la xiriirta Markab u kireysnaa Hay’adda WFP oo af-duub ahaan loogu heysto muddo afar asbuuc ah Xeebaha Puntland.

Markabka Af-duubka lagu heysto oo lagu magacaabo Mv Rozen ayaa wuxuu dib u dhigay markab kale oo Soomaaliya u qaadi lahaa raashin dhan 2,423 metric tonnes.

“Xaaladda Markabka Mv Rozen iyo shaqaalaha saaran oo 12 ruux ah, isla markaana u kala dhashay dalalka SriLanka iyo Kenya waa ay fiican yihiin, hayeeshee weli waxay ku jiraan gacanta af-duubayaasha”sidaasi waxaa tiri Haweeney u hadashay Hay’adda WFP oo lagu magacaabo Ms Savariaud.

Ms Savariaud waxay sheegtay in markabka u kireysnaa lagu heysto Biyaha Badda Puntland, gaar ahaan deegaanka Garacad, waxayna sheegtay in ay sidii loo sii deyn lahaa Markabkaas ay kala hadleen Dowladda Federaalka Soomaaliya, Maamulka Puntland iyo Odayaal Dhaqameedyo, kuwaasi oo u muujiyay sida ay uga xun yihiin af-duubka loo geystay Markabka u kireysnaa.

Markabkan Mv Rozen oo raashin mucaawino ah oo gaaraya 1,800 metric tonnes ku soo dejiyay Dekedaha Berbera iyo Boosaaso ayaa isagoo faaruq ah waxaa uu ku sii jeeday Magaalada Mombasa ee Dalka Kenya. Shaqaalaha Markabka saaran oo 12 ruux ah ayaaney ilaa iyo haatan suurtagelin in midkoodna la sii daayo marka laga reebo in ay jiraan baaqyo la soo saarayo oo lagu dalbanayo in Markabkaas iyo shaqaalaha saaran la sii daayo.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia