Madaxweyne Musaveni oo ka jawaabay eedeyn uga timid Dowladda Eretereya oo ku saabsan Ciidamada uu geeyay Soomaaliya

Talaado, March 13, 2007(HOL): Madaxweynaha Dowladda Uganda Yoweri Museveni ayaa ka jawaabay hadal dhawaan ka soo baxay Dowladda Eretereya oo ku wajahnaa Dowladda Uganda, kaasi oo ahaa in Dowladda Uganda ay Ciidamadeeda kala baxdo dalka Soomaaliya.

Madaxweyne Museveni oo hadalkaasi ka  jawaabayay isagoo ku sugan Madaxtooyadiisa Uganda waxaa uu sheegay in Ciidamada Uganda ee jooga Soomaaliya ay u joogaan Midowga Afrika ahaan, sidaas darteedna wuxuu sheegay in haddii ay Ereteriga wax ka qabto Ciidamada Midowga Afrika ee Soomaaliya jooga in ay la gudboon tahay in ay fikraddeeda hor-geyso shirka Midowga Afrika.

Madaxweyne Yoweri Museveni waxaa uu sheegay in Ciidamada Uganda ee ku sugan Magaalada Muqdisho ay shaqo fiican halkaas ka hayaan, wuxuuna caddeeyay in ay Ciidamadooda aad u taxadarayaan, isla markaana ay qabaan amar ah in aysan sameynin wax ka baxsan sugidda ammaanka.

Wasiirka Warfaafinta Xukuumadda Eretereya Ali Abdu ayaa ugu baaqay Dowladda Uganda in ay ciidmadeeda kala baxdo dalka Soomaaliya, haddii ay kala bixi weysana ay cawaaqib xumo kala kulmi doonto Soomaalida.

Si kastaba arrintu ha ahaatee, Wadamada Midowga Afrika ku bahoobay oo laga sugayay in ay Ciidamo 8,000 gaaraya ay u diraan Soomaaliya ayaa haatan waxay u muuqdaan kuwo ka cago jiidaya in ay ciidamadaas diraan, waxaana ilaa iyo haatan ciidamo u dirtay Soomaaliya Dowladda Uganda, halka ay jiraan dowlado si cad u sheegay in aysan Ciidamo u direynin Soomaaaliya, balse ay siyaabo kale uga qeybqaadanayaan howlgalka nabadeynta Soomaaliya.

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia