Sabti, January 20, 2007(HOL): Kadib Markii qeybo ka mid ah gobollada dhexe ay soo galeen Ciidamada Dowlada federaalka iyo waliba kuwa xukuumada Itoobiya awoodiina lagala wareegay Maleeshiyadii Maxkamadaha Islaamka, ayaa hada waxaa muuqaneysa in ciidamadii Itoobiya ee ku suganaa Gobalada dhaxe ay dib uga baxayaan goobihii ay ku sugnaayeen.
Wararka ka soo baxaya Gobolka Gal-gaduud ayaa sheegaya in Deegaanka Guri-ceel oo ka mid ah goobaha ay sida weyn u degeen ciidamada Itoobiya hadda intoodii badneyd ay kawada baxeen iyagoo dib ugu laabanaya dhinaca Xuduuda, waxaana wararku ay intaas ku darayaan in markii ay baneeyeen ciidamadu goobihii ay fadhiyeen ay soo if-baxeen kooxo doonaya in ay qal-qal ku abuuraan nabad-galyada laakiin ay si weyn isha ugu hayaan ciidamada Dowlada Federaalka ee halkaas ku sugan.
Wariye Jooga Degamada Gure-ceel ayaa u sheegay HOL in waqtigan la oran karo waxa ku sii harsan degamada ay yihiin wax aan sidaa u sii bad-neyn lagana yaabo in xitaa iyaguna ay dib u laabtaan, wariyuhu waxaa uu intaas ku daray in loo maleynayo sababta dib u laabashada keentay in ay tahay iyada oo aysan muuqan khatar badan oo ka jirta deegaanada ay ka baxayaan ciidamada.
Sidoo kale Degmada Matabaan oo ka Tirsan Gobolka Hiiraan ayaa wararka ka soo baxaya waxaa ay sheegayaan in ay ka baxeen ciidamo kooban oo Itoobiyaan ah oo halkaas deganaa, kuwaasi oo u sii dhaqaaqay dhinaca Xadka, waxaana warku intaas ku darayaa in degamada Matabaan Maamulkeedu yahay mid si weyn ilaalo uga haya wax kasta oo keeni kara in nabad-galyadu qal-qal gasho.
Gobalka Hiiraan gaar ahaan Magaalada B/weyn oo markii horeba aysan soo galin ciidamo tiro badan ayaa waxaa xusid mudan in ay dib uga laabteen wax xoogaa ciidamo ah oo dagenaa goob ka baxsan garoonka diyaaradaha oo ay hadda gacanta ku hayaan ciidamada dowlada fedaraalka iyo waliba ciidamadii horay gacanta ugu hayay, laakiin Degmada Dhuusa-mareeb oo ka tirsan gobolka Gal-gaduud ayaa wararka ka soo baxaya waxaa ay sheegayaan in wali ay joogaan ciidamada Dowladda Itoobiya.
Si kastaba arintu ha ahaatee marka aad eegto dib u laabashadan ciidamadu ay sameynayaan ayaan la oran karin waa mid meesha ka saareysa ka warqabka Amaanka goobaha ay ka baxeen maadama marka aad Xuduuda eegto aysan waxba u jirin deegaanada ay baneeyeen, waxaa iyana jirta in waliba Gobollada ay ka baxeen qaarkood ay ku harsan yihiin saraakiil sida la sheegay farsamo ahaanta u caawinayay kuwa Dowlada Fedaraalka, taasoo meesha ka saareysan khatar soo muuqan karta.
C/raxmaan Diini, Hiiraan Online
