Arbaco, December 20, 2006(HOL): Ciidamadan oo gaaraya Ilaa 500 oo Askari, kuna hubeysan Gawaarida Dagaalka ayaa mar kaliya u dhaqaaqay dhinaca Gobalka Bakool oo baryihii aynu soo dhaafnayba ay ka taagneyd xiisad dagaal oo u dhaxeeysa ciidamada Dowladda Federaalka iyo Kuwa Maxkamadaha Islaamka.
Ciidamadan oo Maalmihii aynu soo dhaafnayba si weyn looga hadal hayay Gudaha magaalada ayaa sida warar xog-ogaal ah xaqiijinayaan waxaa ay qeyb ka noqon doonaan ciidamada Midowga Maxkamadaha ee horay ugu sugnaa Degaano ka tirsan Gobalka Bakool, Gaar ahaan aaga Degmada Tiyeeglow.
Qaar ka mid ah mas’uuliyiinta Maxkamadda Islaamiga Gobolka oo arrintaasi wax laga weydiiyay ayaa ka gaabsaday in ay ka hadlaan waxa xilgan ku soo beegay bixitaanka ciidamada, sidoo kalena waxaa ay diideen in ay xaqiijiyaan halka rasmiga ah ee Ciidamadaasi ay tagayaan.
Maalmihii aynu soo dhaafanay ayaa waxaa ka jiray gudaha gobalka arrimo ku aadan tababa baridda Ciidamo cusub iyo waliba Isku shaan-dheyn dhinaca difaaca ah oo lagu sameynayo kuwii hore, Iyadoo ciidamadii horay u joogay deegaanka Kala-Beyr loo qeybiyay saddex qeybood oo kala ah kuwo loo diray dhinaca Bandiiradley, kuwa ku sii sugnaanaya Kala-Beyr, iyo waliba kuwa kale oo loogu talagalay in ay u amba baxaan dhinaca deegaanka Far-libaax oo xuduud la leh dhulka Itoobiya.
Arrimahan oo dhan ayaa waxay ku soo beegmayaan xilli Gobolka maalmihii aynu soo dhaafnay uu ku sugnaa Aadan Xaashi Ceyrow oo ka tirsan Guddiga Fulinta Maxkamadaha Islaamiga, kaasi oo kulamo dhinaca Ammaanka ah la lahaa mas’uuliyiinta Maxkamadda Gobalka Hiiraan.
C/raxmaan Diini, Hiiraan Online
