Isniin, December 18, 2006(HOL): Ciidamada Maxkamada Islaamiga Gobalka Hiiraan ayaa waxaa ay la wareegeen Gaari uu lahaa Safiirka Dowlada Soomaaliya u fadhiya Dalka Itoobiya C/kariin Faarax la qanyo oo dhawaan wareysi uu kaga hadlayo sida uu u arko Siyaada Midowga Maxkamadaha siiyay Mid ka mid Idaacada ka howla-gala Magaalada Muqdisho.
Qaar ka mid ah Mas’uuliyiinta Maxkamada oo ay HOL wax ka weysiisay sababta keentay in lala wareego Gaariga Safiirka ayeey ka gaabsadeen Mas’uuliyiintu iyaga oo sheegay oo kaliya in ay la soo wareegeen Gaariga,
Ilaa hadda majiro War Rasmi ah oo si faah faahsan uga hadlaya sababta keentay in xiligan Ciidamada Maxkamadu la wareegaan Gaariga oo noociisu yahay (Cabdi Bilaha) oo wixii ka horeeyay wareysiga uu bixiyay Safiirka ku sugnaa Gudaha magaalada.
Warar hoose oo soo baxaya ayaa sheegaya in Qabsashada gaarigan lala xiriirinayo Waraysiga Safiirka oo sheegay in marka laga hadlayo Dowlada faderaalka iyo Midowga Maxkamadaha yihiin Wax jira iyo wax aan jirin oo kale, isaga oo ku tilmaamay Maxkamaduhu in ay yihiin Jabhado hubeysan,
waxaana uu intaa ku daray C/kariin Faarax laqanyo in Dowlada Itoobiya ay la dirireyso Ciidamo Ajnabi ah oo ay Maxkamaduhu soo hubeynayaan, isagoo sidoo kalna sheegay in wixii hada ka danbeeya Dowladu kotarooli doonto Diyaaradaha ka daga magaalada Muqdisho.
Dadka ku dhaqan Magaalada B/weyn ayaa siweyn u hadal haya Qabsashada Gaariga Safiirka, waxaana jira in dadku siyaabo kala duwan arintaa uga hadlayo, inkastoo marka dhinac laga eego aritani ay muujineyso Farqiga durugsan ee u dhaxeeya Xubnaha gacan saarka la leh Dowlada Federaalka iyo Midowga maxkamadaha.
C/raxmaan Diini, Hiiraan Online
