Jimco, December 01,2006(HOL): Waxaa inta badan hada ay Qoysasku bilaabeen in ay dib ugu soo laabtaan guryahoodii, ka dib markii Maamulayaasha dugsiyada waxbarashada magaalada oo kulan qaatay ay ku dhawaaqeen wixii ka dambeeya 2, Dec. 2006 dib dhamaan loogu furo Goobihii waxbarashada oo la xiray xiligii Fatahaada.
Qoysaska dib u soo laabanaya oo ah kuwo caruurtoodu ay wax ka bartaan dugsiyada waxbarashada Magaalada ayaa u muuqda kuwo ka door bidaya dhibaato kasta oo ka jirta gudaha magaalada in curuurtoodu waxbarashada dib ugu laabtaan, Maadaama aysan Jirin gadiid Caruuta ka soo qaadaya Goobaha dadku ku bara kacay, islamarkaana Qoysasku aysan awood u laheyn maalin kasta in ay ka bixiyaan Caruurta lacag ay ku sii raacaan gadiidka BL ka ah ee taga gudaha Magaalada.
Laakiin waxaa iyagu ka bad baaday dib ugu soo laabashada gudaha magaalada Qoysaska caruurtoodu ay wax ka bartaan Dugsiga Hoose Dhaxe iyo sare ee Mujamaca ee Magaalada B/weyn oo uu maamulkiisu sheegay in ay diyaariyeen Gadiid ka soo qaada Caruurta Deegaanada Ceel-jaale iyo waliba Jante-guudisho islamarkaana dib u celinaya marka ay waxbarashada dhameystaan.
Hayeeshee Fursadan ay heysataan Ardayda Dugsiga Mujamac ayaan aheyn mid laysku wada haleyn karo, waayo waxaa jira cabasho ardaydu ay ka muujinayaan waqtiga loo qabtay in ku diyaar garoobaan si gadiidku u soo qaado oo ah xili hore, waxaana ay ardaydu kuu sheegayaan in mar walba lagama maar maan ay tahay in Gadiid BL ah Raacaan ama dib ugu laabtaan gudaha magaalada.
Dib ugu soo laabashada Gudaha magaalada Qoysaskii markii hore ka bara kacay ayaan ahayn mid ku timid oo kaliya dib u furista goobaha waxbarashada oo kaliya laakiin marka dhanka kale la eego waxaa jira in inta badan la soo gabo gabeeyay kaalmadii la siin jiray Qoysaskaasi gaar ahaan Biyaha oo hada gabaabsi sii noqonaya.
Qaar ka mid ah Mas’uuliyiita Hay’adaha ICRC oo ka shaqeysa gaarsiinta biyaha dadka soo bara kacay ayaa u sheegay HOL in goor dhaw la soo afjari doono biyo gaarsiinta dadka bara kacay, maadama sida ay sheegeen mas’uuliyiintu hada magaaladu u muuqato mid dadku dib ugu laaban karo.
Si kastaba Magaalada B/weyn oo maalmihii hore aheyd mid cidlo ah ayaa hada u muuqata mid shacabku dib ugu soo laabanayo walow Qoysas badan waliba kuwo dan yarta ah aysan u muuqan kuwo bilaha soo socda dib u soo laaban kara dhibaato ka heysata dhinaca hoyga awgeed.
C/raxmaan Diini, Hiiraan Online
diini@hiiraan.com
Beledweyn, Somalia
