Madaxweynaha ayaa si cad u sheegay in Soomaaliya u baahan tahay $6.3 bilyan oo doolar si ay si buuxda uga jawaabto, ugana hortagto saameynta isbeddelka cimilada ee sii kordhaya.
Madaxweyne Xasan Sheekh wuxuu caddeeyay in Soomaaliya ay wajahday dhibaatooyin xagga cimilada ah sida abaaro, fatahaado iyo nabaad-guur baahsan, Dalka u baahan yahay $6.3 bilyan si loo maalgeliyo qorshayaal iyo mashaariic lagula qabsanayo cimilada, kuwaas oo ay ka mid yihiin, Xoojinta adkeysiga bulshooyinka nugul iyo Dib-u-dhiska kaabeyaasha biyaha iyo wax-soo-saarka.
Madaxweynaha ayaa xusay in Inkasta oo Soomaaliya aysan lahayn door muuqda oo keena isbeddelka cimilada, haddana ay tahay mid ka mid ah dalalka ugu nugul ee uu isbeddelku saameeyo.
Madaxweynaha wuxuu ugu baaqay Beesha caalamka iyo hay’adaha maaliyadeed in ay ka jawaabaan baaqa Soomaaliya, oo la xoojiyo maalgelinta la xiriirta isbeddelka cimilada.
Hadalkan Madaxweynaha Soomaaliya ayaa muujinaya baahida degdegga ah ee dhaqaale ee uu dalku u qabo si loo badbaadiyo nolosha malaayiin qof oo la daalaa dhacaya dhibaatooyin cimiladeed, Codsiga ah $6.3 bilyan ayaa ah mid ujeedkiisu yahay in Soomaaliya hesho fursad ay kaga hortagto, ugana gudubto khataraha sii kordhaya ee deegaanka.
