Tani waxay Soomaaliya u suuragelin doontaa inay hesho xog sax ah oo cimilada la xiriirta, taas oo muhiim u ah qorsheynta, digniinta degdegga ah, iyo la tacaalida xaaladaha degdegga ah sida abaaraha iyo fatahaadaha.
Hay’addan ayaa lagu wadaa inay noqoto tiir muhiim u ah dadaallada dalka ee la xiriira La socodka isbedelka cimilada, Digniinaha degdegga ah ee roobabka iyo duufaannada, Taageeridda beeraleyda iyo kalluumeysatada iyo Ka qaybgalka barnaamijyada caalamiga ah ee ilaalinta deegaanka
Madaxweynaha ayaa intaa ku daray in sameynta hay’addan ay qeyb ka tahay dadaallada dowladda ee dib u dhiska hay’adaha muhiimka u ah horumarka iyo xasiloonida dalka.
Soomaaliya ayaa si weyn uga mid ah dalalka uu si ba’an u saameeyay isbeddelka cimilada, iyadoo sanad walba la kulanta abaaro, fatahaado, iyo khatarta duufaanno, Madaxweynuhu wuxuu sheegay in hay’addan cusub ay qeyb ka noqon doonto ka hortagga saameyntaasi, isla markaana la dhisi doono awoodaha qaran ee la tacaala isbeddelka cimilada.
Dhismaha Hay’adda Saadaasha Hawada Soomaaliya waa tallaabo istaraatiiji ah oo dalka ka caawin doonta inuu si firfircoon uga qeyb qaato la tacaalka isbeddelka cimilada, iyo in bulshada Soomaaliyeed laga wacyigeliyo khataraha ay la kulmaan, haddii ay Baarlamaanku ansixiyaan, hay’addani waxay noqon doontaa mid muhiim u ah qorsheynta iyo horumarinta dalka.
