Kulanka ayaa diiradda lagu saaray xoojinta xiriirka iyo iskaashiga u dhexeeya Dowladda Federaalka Soomaaliya iyo Midowga Yurub, Labada dhinac waxay si qoto dheer uga wada hadleen arrimo muhiim ah oo ay ka mid yihiin dib-u-eegista dastuurka iyo xeerarka muhiimka ah ee horyaalla Baarlamaanka.
Guddoomiyaha Baarlamaanka ayaa soo dhaweeyay danjiraha cusub, isagoo muujiyay sida dowladda Soomaaliya ay uga go’an tahay sii xoojinta xiriirka istiraatiijiga ah ee ay la leedahay Midowga Yurub.
Waxa uu xusay kaalinta muhiimka ah ee Midowga Yurub ka qaato taageeridda dowlad-dhiska Soomaaliya, gaar ahaan dhanka ammaanka, maamulka suuban, iyo waxbarashada.
Danjire Francesca Di Mauro ayaa dhankeeda uga mahadcelisay Guddoomiyaha doorkiisa hoggaamineed iyo sida uu ugu heelan yahay horumarinta xiriirka labada dhinac, Waxay carabka ku adkeysay muhiimadda ay leedahay sii wadidda iskaashiga si loo gaaro horumar waara.
Danjiraha ayaa sidoo kale ammaanay dadaalka dowladda Soomaaliya ee ku aaddan dhismaha hay’adaha dowladeed iyo kor u qaadidda kalsoonida beesha caalamka.
Midowga Yurub wuxuu sheegay inuu sii wadi doono taageerada uu siiyo Dowladda Federaalka Soomaaliya, gaar ahaan dhinacyada ammaanka, maamulka, iyo horumarinta waxbarashada, Iskaashigan joogtada ah ayaa muhiim u ah Soomaaliya oo ku jirta marxalad kala-guur ah oo ay uga gudbayso caqabado badan si ay u gaarto xasillooni iyo horumar waara.
