Magacaabista Agaasimaha cusub ayaa lagu tilmaamay iney tahay mid muhiim u ah dardar galinta dagaalka ka dhanka ah kooxda Al-shabaab si loo xoojinayo hay’adaha ka shaqeeya amniga maskaxda iyo ilaalinta fikirka bulshada Soomaaliyeed.
“Magacaabistan ayaa ka tarjumaysa sida ay Xukuumadda DanQaran mudnaanta u siinayso ciribtirka khataraha Khawaarijta iyo aragtiyaha gurracan ee halista ku ah midnimada iyo amniga Qaranka” ayaa lagu yiri qoraal kasoo baxay Xafiiska Raysal wasaare Xamse Cabdi Barre
Raysal Wasaaraha ayaa u rajeeyay Agaasimaha cusub inuu dardargeliyo howlaha muhiimka ah ee xarunta, si ay u noqoto tiir adag oo kaalin muuqata ka qaata la dagaallanka Al-shabaab.
Xarunta TUBSAN ayaa ah hay’ad qaran oo si gaar ah u qaabilsan ka hortagga iyo ciribtirka fikradaha xagjirka ah, iyadoo la shaqeysa hay’adaha amniga, waxbarashada, diinta iyo bulshada rayidka ah, waxaana xilkaan horay u haayay oo laga qaaday Cabdullaahi Maxamed Nuur.
