Kulankan ayaa qeyb ka ah dadaallada sii socda ee lagu xoojinayo xiriirka walaaltinimo iyo darisnimo ee labada dal ee deriska ah, waxaana lagu qabtay magaalada Djibouti.
Madaxweynayaashu waxay si qoto dheer uga wada hadleen xaaladda amniga ee gobolka Geeska Afrika, gaar ahaan halista ay kooxda Al-Shabaab ku hayso xasilloonida Soomaaliya iyo guud ahaan gobolka.
Madaxweyne Xasan Sheekh wuxuu uga mahadceliyay dowladda Jabuuti doorka ay ku leedahay howlgalka ATMIS iyo taageerada ay siiso ciidamada Soomaaliyeed.
Waxaa laga wada hadlay sidii loo xoojin lahaa xiriirka ganacsi iyo maalgashi ee labada dal, Labada Madaxweyne waxay isla qaateen in la dhiso guddi joogto ah oo ka shaqeeya kor u qaadidda iskaashiga dhaqaale, suuqyada, iyo horumarinta dekedaha.
Madaxweyne Xasan Sheekh wuxuu si gaar ah u muujiyay walaaca ku aaddan abaaraha ba’an ee ka jira gobolka Awdal, wuxuuna codsaday taageero degdeg ah oo ka timaadda dowladda Jabuuti.
Madaxweyne Geelle wuxuu ballan qaaday in Jabuuti diyaar u tahay in ay garab istaagto shacabka Soomaaliyeed, gaar ahaan dadka ay saameeyeen abaaraha iyo culeyska nolosha.
Labada Madaxweyne waxay adkeeyeen muhiimada ay leedahay iskaashi guud oo u dhexeeya dalalka Geeska Afrika, si loola tacaalo caqabadaha amniga, isbeddelka cimilada, iyo saboolnimada. Waxay muujiyeen in xasilloonida Soomaaliya ay tahay tiir-dhexaad u ah nabadda gobolka.
