Shirkaan ayaa waxaa ka qeyb galay masuuliyiin kala duwan oo isugu jira heer fedaraal, heer dowlad goboleed, wakiilo ka socda beesha Caalamka, ururrada aan dowliga ahayn (NGOs), iyo bulshada rayidka ah.
SoDMA ayaa warsaxafadeed ay soo saartay ku sheegtay in shirkaan ujeedkiisu yahay in dib loo eego oo la tayeyo Siyaasadda Qaranka ee Maareynta Masiibooyinka iyo sidii loo maareyn lahaa xaaladaha dhabta ah ee Musiibooyinka.
Guddoomiyaha SoDMA Maxamuud Macalin Cabdulle oo furitaanka shirka ka hadlay ayaa sheegay in muhiimada shirkan u yahay dhismaha siyaasad qaran oo dhamaystiran, islamarkaana loo dhan yahay.
“Aqoon-isweydaarsigan wuxuu na siinayaa fursad aan ku mideyno khibrad, aragti, talo iyo dhaliil si loo helo siyaasad aan kaliya ahayn mid loo dhan yahay, balse sidoo kale la taaban karo, waarta, oo waafaqsan xaaladaha dhabta ah ee dalka ka jira,” ayuu yiri Guddoomiyaha SoDMA Maxamuud Macalin Cabdulle.
Shirkaan ayaa noqonaya kii ugu balaarna oo ay hay’adda SoDMA ku qabato magaalada Muqdisho ee looga arinsanaayo arrimaha la xariira Siyaasadda Qaranka ee Maareynta Masiibooyinka, waxaana lagu wada in shirkaan ay kasoo baxaan natiijooyin rasmi ah.
