Ciidamadaan oo Salaadda Subax kaddib la wareegay Amniga Guriga Hooyooyinka ayaa xiray xubno ka mid ah Ururka Haweenka kuwaas oo Gaadiidka Shabaqa loo yaqaano ee Maxaabiista lagu qaado lagu guray, waxaana wararka aan helnay ay sheegayaan in laba kamid ah kuxigeenadii Gudoomiyaha Ururka Haweenka ay ku jiraan dadka xabsiga loo taxaabay.
Ra’iisul Wasaaraha Soomaaliya Xamse Cabdi Barre ayaa horay u yiri “waa in la banneeyaa Guriga Hooyooyinka Mana kusii jiri karaan Ururka Haweenka Qaranka ee dhismaha Hooyooyinka, Wasaaradda Haweenka ayaa ku shaqaysanaysa Daartaas” taa oo ay ka biya diideeen Ururka Haweenka hadalkaas kasoo yeeray Ra’iisul wasaaraha.
Hayeeshee dhowr jeer ayay bannaan bax ka sameeyeen Afaafka hore ee Hooyooyinka iyo guud ahaan xarunta Hooyooyinka iyagoo eedeeyn kulul u jeediyay Ra’iisul Wasaare Xamse ayna sheegeen in Guriga Hooyooyinka laga iibinayo rag ganacsato ah ayna is hortaagi doonaan awood walba oo isku dayda inay dhismahaasi ka saarto.
Markii ugu dambeeysay Gudoomiyaha Ururka Haweenka Qaranka Batuulo Gabale ayaa sheegtay inay gal dacwadeed ka furtay Maxkamadda Gobolka Banaadir oo la xiriiray eedeeynta ay ujeediyeen Ra’iisul Wasaaraha iyo sidoo kale inuu jiro qorshe lagu iibinaayo Gurigaasi.
